Perınataldyq uıymdardyń kóbi materıaldyq-tehnıkalyq talapqa saı emes – Smaıylov
«Qazirgi tańda memleket áıelderdiń densaýlyǵyn jaqsartý máselesine basa kóńil bólýde. Perınataldyq uıymdardyń materıaldyq-tehnıkalyq jaǵdaıyna erekshe nazar aýdarý qajet. Olardyń kópshiligi talapqa saı emes. Bul sapaly medıtsınalyq kómekti tolyq kólemde kórsetýge múmkindik bermeıdi. Sondyqtan da birinshi kezekte ana men balany qorǵaý jónindegi tujyrymdama jobasynda perınataldyq ortalyqtardyń ınfraqurylymyn jańǵyrtýdy eskerý kerek», - dedi Álıhan Smaıylov Úkimet otyrysynda.
Sondaı-aq, Premer-Mınıstr Densaýlyq saqtaý mınıstrligine Almatydaǵy akýsherlik, gınekologııa jáne perınatologııa ǵylymı ortalyǵyn jóndeý jáne jaraqtandyrý máselesin jedeldetýdi tapsyrdy.
«Ákimdikter jumyspen qamtý kartasy sheńberinde áıelderdi jumyspen qamtý sharasyn jalǵastyrýy qajet. Eńbek mınıstrligi osy baǵyttyń iske asyrylýyn úılestirý men monıtorıng júrgizýdi qamtamasyz etsin. Sonymen qatar ákimdikter «Damý» qory jáne «Atameken» palatasymen birlesip, kásipker áıelderdiń jobalaryn qarjylandyrýdy keńeıtý, olardy kapıtaldy kóp qajet etetin jobalarǵa tartý jónindegi jumysty kúsheıtýi qajet. Osy jumystyń júrgizilýin keńinen túsindirý úshin Aqparat mınıstrligi qoldaý kórsetýi tıis», - deıdi ol.
