PepsiCo jáne LC Waikiki: nelikten iri ınvestorlar kedergige tap boldy

ASTANA. KAZINFORM – Bıznes ózindegi rásimderdi tez iske asyrady, al memleketke tıesili jumystar keshigip jatyr. Bul týraly Senatta ınvestorlardyń zańdy múddelerin qorǵaý taqyrybyna arnalǵan jıynda QR Syrtqy ister mınıstrliginiń Investıtsııa komıtetiniń tóraǵasy Ǵabıdýlla Ospanqulov málim etti.

- Problemalardyń biryńǵaı tizilimine ınvestorlardan 76 máseleni jınadyq. Qazir 39 másele pysyqtalyp jatyr. Olardyń arasynda ákimshilik kedergiler, jer máselesi, qoldanystaǵy zańnamanyń máseleleri, normatıvtik-quqyqtyq aktilerge ózgerister engizý, salyq salý, ınfraqurylym jáne qarjylandyrý problemalary qamtylǵan. Máselen, ınfraqurylymnyń jetispeý men onyń tez arada qamtamasyz etilmeýi problemasy bar. Qazir PepsiCo, Carlsberg, Eurasia Agro Semey sııaqty iri transulttyq kompanııalar jáne basqa da kompanııalar óz zaýyttaryn salyp jatyr. Alaıda jergilikti atqarýshy organdar ınfraqurylymdy der kezinde qamtamasyz etpeı otyr. Zaýyt salynady, biraq ol jumys istemeıdi. Atalǵan másele saldarynan óndiris turalap qalady. Nelikten? Óıtkeni memlekettiń kóptegen kelisý organdary bar, - dedi Ǵ. Ospanqulov.

Onyń aıtýynsha, osy baǵyttaǵy sheshimderdi jedeldetý kerek nemese jyldam sheshim qabyldaý úshin bir memlekettik organǵa ókilettik berý qajet.

- Bıznes ózindegi rásimderdi tez iske asyrady, al memleketke tıesili jumystar keshigip jatyr. Bul rette ınvestıtsııalyq jobalarymyz sapasyz bolýy yqtımal nemese múlde júzege aspaı qalýy múmkin. Osy kemshilikter ınvestorlar arasynda jyldam taralady. Sondyqtan Qazaqstanǵa ınvestorlardy tartý qıyn bolady. Atap aıtqanda, Prezıdent osy kedergilerdi joıý baǵytynda naqty tapsyrma berdi. Mysaly, LC Waikiki Almaty oblysynda úlken logıstıkalyq keshendi saldy. Endi óz qarajatyna ınfraqurylym ótkizeıin dese, qasyndaǵy adamdardyń bári jerin alyp alǵan, eshkim kanal (ınfraqurylym tartatyn) bermeı otyr, ruqsat bermeı jatyr. Qomaqty aqsha surap jatyr, ol da korrýptsııaǵa alyp keltetin másele. Óz kezeginde ınvestor olardyń talabyn oryndaýdan bas tartty. Endi ákimdikten osy máseleni sheship berýdi suraǵan, alaıda olar da sheshe almaı jatyr, - dedi Investıtsııa komıtetiniń tóraǵasy.

Budan buryn habarlanǵandaı, ınvestorlar kóbine qaı máseleler boıynsha shaǵymdanyp otyrǵany málim boldy.