Penjimdegi shyǵyn qalpyna keltirildi – ákimdik
TALDYQORǴAN. QazAqparat - Almaty oblysynyń Panfılov aýdanyndaǵy Penjim aýylynda bolǵan oqıǵadan keıin aýyldaǵy úılerdiń materıaldyq shyǵyndary eseptelip jatyr, dep habarlaıdy QazAqparat tilshisi Panfılov aýdany ákiminiń baspasóz qyzmetine silteme jasap.
Qazirdiń ózinde 30-dan astam úıdiń terezeleri tolyqtaı qalpyna keltirilgen. Barlyq shyǵyndy Serik Aqsýbaev, Zakırjan Kýzıev syndy belgili kásipkerler «ótep beremiz» dep otyr. Sonymen qosa terezeleri synǵan kólikter de qalpyna keltirilip jatyr.
«Tizim boıynsha barlyq úıdiń terezeleri qalpyna keltirilýde. Osy baǵytta jigitter jumys júrgizýde. Bastysy el aman, tatýlyq, birlik bolsyn»,- deıdi kásipkerler.
Sondaı-aq, oqıǵa bolǵan kúni kezdeısoq órtengen úıge aýdan ákimdigi atalǵan kásipkerlermen birlesip kómek kórsetetin boldy. Elektr symynyń tuıyqtalýynan tolyqtaı órtengen úıdi qaıta qalpyna keltirý júrgizilip jatyr.
Esterińizde bolsa 27 qazan kúni Penjim aýylynda eki oqýshynyń tóbelesinen soń aýyl jastary kóshege shyǵyp, soqqyǵa jyqqan taraptan keshirim suraýyn talap etken bolatyn. Qazirgi ýaqytta polıtsııa «Eki jáne odan da kóp adamnyń densaýlyǵyna qasaqana zııan keltirý» jáne «Buzaqylyq» baptary boıynsha tergeý júrgizýde.
