Pentagon usynǵan jobalardyń biri Irannyń joǵarǵy kóshbasshysyn joıýdy kózdeıdi

ASTANA. KAZINFORM – Axios basylymynyń habarlaýynsha, AQSh Qorǵanys mınıstrligi Donald Trampqa Iranǵa qatysty birneshe yqtımal is-qımyl nusqasyn usynǵan. Solardyń biri Irannyń joǵarǵy kóshbasshysy Alı Hameneı men onyń ulyn joıýdy kózdeıdi, dep jazady VVS.

Basylymǵa pikir bildirgen joǵary laýazymdy amerıkalyq sheneýniktiń aıtýynsha, Aq úı Iranǵa bomba jasaýǵa múmkindik bermeıtin jaǵdaıda ýrandy sımvolıkalyq deńgeıde baıytýǵa ruqsat berý máselesin qarastyrýǵa daıyn.

«Eger ırandyqtar shabýyldyń aldyn alǵysy kelse, biz bas tarta almaıtyn usynys jasaýy tıis. Olar únemi múmkindikti jiberip alady. Eger ýaqyt sozyp, oıynǵa kóshse, tózim taýsylady», – degen sheneýnik.

Óz kezeginde Irannyń syrtqy ister mınıstri Abbas Arakchı aldaǵy eki-úsh kún ishinde Tegerannyń usynysy tolyq pysyqtalatynyn málimdegen.

Axios derekkózi AQSh prezıdenti soqqy berý týraly áli túpkilikti sheshim qabyldamaǵanyn aıtqan.

«Prezıdent áli soqqy jasaý jóninde sheshim qabyldaǵan joq. Ol mundaı sheshim qabyldamaýy da múmkin», – degen sheneýnik.

Onyń sózinshe, Pentagon Trampqa kez kelgen stsenarııge arnalǵan birneshe nusqa usynǵan.

«Bir stsenarıı aıatolla men onyń ulyn jáne dinı jetekshilerdi joıýdy qarastyrady. Prezıdent qaı nusqany tańdaıtyny belgisiz», – dep keltiredi basylym derekkóz sózin.

Taǵy bir aqparat kózi Hameneı men onyń ulyn joıý jospary birneshe apta buryn usynylǵanyn rastaǵan.

Qazirgi tańda Iran ýrandy baıytpaı otyr. Maýsym aıyndaǵy áýe soqqylarynan keıin eldiń ıadrolyq nysandaryndaǵy tsentrıfýgalar edáýir zaqymdanǵan. Alı Hameneı Iran beıbit maqsatta ýran baıytý quqyǵynan bas tartpaıtynyn málimdegen. Al Donald Tramp Irannyń ýran baıytý múmkindigine jol bermeıtinin birneshe ret aıtqan.

Aıta keteıik, Iran BUU-ǵa AQSh tarapynan áskerı agressııa bolǵan jaǵdaıda «batyl» jaýap beretinin eskertti.