Pentagon Nıgerııadaǵy radıkaldarǵa qarsy shara daıyndap jatqanyn málimdedi

ASTANA. KAZINFORM — Pentagon basshysy Pıt Hegset AQSh prezıdenti Donald Tramptyń tapsyrmasy boıynsha vedomstvo Nıgerııadaǵy «ıslamdyq terrorısterge» qarsy kúsh qoldaný sharalaryn ázirlep jatqanyn aıtyp, bul sharalar hrıstıandardy qorǵaý úshin qabyldanýy múmkin ekenin málimdedi, dep habarlaıdy TASS.

Hegset X-tegi jazbasynda: «Nıgerııadaǵy jazyqsyz hrıstıandardy óltirý dereý toqtaýy tıis» dep jazdy. «AQSh Qorǵanys mınıstrligi áreket etýge daıyndalyp jatyr. Ne Nıgerııa úkimeti hrıstıandardy qorǵaýy tıis, ne biz osy aıaýsyz qylmysty jasaıtyn ıslamdyq terrorısterdi óltiremiz», dedi ol.

Buǵan deıin Tramp ta Nıgerııadaǵy radıkaldarǵa qarsy yqtımal kúshtik sharalardy daıyndaýdy Pentagonǵa tapsyrǵanyn málimdegen edi. Onyń aıtýynsha, eger Nıgerııa úkimeti hrıstıandardyń ólimine jol berýdi jalǵastyrsa, AQSh bul elge barlyq kómek pen qoldaýdy dereý toqtatady jáne «tolyq qarýlanyp bul elge kirip, osy ıslamdyq terrorısterdi tolyq joıýy múmkin».

31 qazanda AQSh prezıdenti Nıgerııada hrıstıan dinine qaýip tónip turǵanyn málimdedi. Sol sebepti ol Nıgerııany «alańdaýshylyq týdyratyn el» dep atady. Tramp AQSh olardy qorǵaıtynyn aıtty.

Buǵan deıin Nıgerııada aýyldarǵa qarýly shabýyldar kezinde 13 adam qaza tapqany týraly jazdyq.