Pentagon men Anthropic-tiń jasandy ıntelektini qoldaný boıynsha pikirleri kereǵar
ASTANA. KAZINFORM – Anthropic óziniń ónimderin áskerı maqsatta qoldanýǵa shekteý engizgen. Osyǵan baılanysty kompanııa men AQSh-tyń qorǵanys mınıstrligi arasynda kúrdeli kelissiózder júrip jatyr, dep habarlaıdy Kazimform agenttiginiń Vashıngtondaǵy menshikti tilshimi NBC News – ke silteme jasap.
Jeltoqsan aıynda Anthropic kompanııasy Pentagonǵa ózderiniń jasandy ıntellekt júıelerin zymyranǵa qarsy qorǵanys pen kıberqaýipsizdik salasynda qoldanýǵa kelisim bergen bolatyn.
Alaıda seısenbi kúni AQSh qorǵanys mınıstri Pıt Hegset kompanııanyń bas dırektory Darıo Amodeıge qatań shart qoıdy: jumaǵa deıin jasandy ıntellekt tehnologııasyn barlyq zańdy áskerı maqsatta qoldanýǵa ruqsat berýi tıis, óıtpegende kompanııaǵa qorǵanys salasyndaǵy kelisimsharttarǵa qatysýǵa tyıym salynýy múmkin.
Daýdyń túp-tórkini — Anthropic-tiń óz ónimderin el ishinde jappaı baqylaý júrgizýge nemese avtonomdy ólim ákeletin qarý júıelerinde paıdalanýǵa tyıym salatyn qatań qaǵıdalardy ustanýy.
Pentagon basshylyǵy qajet bolǵan jaǵdaıda kompanııany talapqa kóndirý úshin Qorǵanys óndirisi týraly zańdy qoldanýy múmkin ekenin málimdedi. Bul zań prezıdentke ulttyq qaýipsizdikke tikeleı qatysty mańyzdy máselelerde amerıkalyq kompanııalardyń qyzmetin baqylaýǵa múmkindik beredi.
Anthropic — jasandy ıntellekt salasynda jumys isteıtin tórt iri kompanııanyń biri. Olardyń qatarynda OpenAI, Google DeepMind jáne xAI bar. Atalǵan kompanııalar shilde aıynda AQSh ulttyq qaýipsizdigin nyǵaıtýǵa baǵyttalǵan ozyq jasandy ıntellekt múmkindikteriniń prototıpterin ázirleý úshin jalpy somasy 200 mıllıon dollarǵa deıingi kelisimsharttarǵa ıe bolǵan.
Buǵan deıin Qytaıdyń adam beınesindegi robottary álemdik naryqty jaýlaı bastaǵany týraly jazdyq.
