Pentagon qupııa aqparat taralýyna baılanysty áskerı shendilerdi polıgraftan ótkizdi
ASTANA.KAZINFORM — AQSh-tyń qarý-jaraq qorlary týraly qupııa aqparattyń taralýyna baılanysty Pentagonda aýqymdy tekseris júrgizildi, ondaǵan joǵary laýazymdy áskerı sheneýnikter polıgraftan ótti, dep habarlaıdy CBS News.
Bıyl jazda BAQ-ta AQSh-tyń dáldigi joǵary qarý-jaraq qorlary men jekelegen oq-dári túrleriniń azaıyp bara jatqany týraly qupııa aqparat jarııalanǵannan keıin aýqymdy tekserister bastalǵan.
Tekseristen ótkenderdiń arasynda AQSh Ortalyq qolbasshylyǵynyń ókilderi, sondaı-aq basqa da jaýyngerlik qolbasshylyqtardyń komandırleri boldy. Alaıda, Shtab bastyqtary birikken komıtetiniń tóraǵasy general Den Keın polıgraftan ótpegen.
CBS News derekkózderine súıensek, tekseris barysynda ulttyq qaýipsizdiktiń ártúrli aspektilerine qatysty suraqtar qoıylǵan. Al tekseriske qatysqandardyń eshbiri qupııa aqparattyń BAQ-ta jarııalanýyna qatysty suraqtardan súrinbegen.
Pentagon áskerı qyzmetshiler jáne tekseriske qatysty qandaı da bir túsinikteme berýden bas tartyp keledi.
— Mınıstrlik ulttyq qaýipsizdik salasyndaǵy barlyq qupııa aqparattyń taralýyna óte baıypty qaraıdy jáne tıisti tekserister júrgizýde. Qupııa aqparatty qorǵaý Amerıka Qurama Shtattarynyń jáne búkil álemdegi amerıkalyq áskerı qyzmetshilerdiń qaýipsizdigi úshin asa mańyzdy, — deıdi Pentagon ókili Shon Parnell.
Shilde aıynda Pentagon basshysy Pıt Hegset úkimettiń qupııa aqparatyn baspasózge jarııalady degen kúdikke ilingen adamdardy anyqtaý jáne qylmystyq jaýapkershilikke tartý maqsatynda Ádilet mınıstrligimen birlesken arnaıy top qurylǵanyn jarııalady.
CBS News arnasy qupııa materıaldarǵa qol jetkize alatyn áskerı jáne azamattyq sheneýnikter úshin polıgraf synaǵy sırek qubylys emes ekenin atap ótti. Degenmen, kóptegen áskerı shendilerdiń bir ýaqytta tekserilýi óte sırek kezdesedi. Federal tergeý bıýrosy bul synaqtarǵa qatyspaǵan.
Buǵan deıin AQSh áskerı qyzmetkerlerdi testosteron jetispeýine baılanysty mindetti synaqty toqtatqany týraly habarlanǵan bolatyn.
Nurlan Tuıaqov
