Pentagon Iranmen qaqtyǵys saldarynan oq-dári tapshylyǵy baryn moıyndady
ASTANA. KAZINFORM — Pentagon Iranmen qaqtyǵys saldarynan oq-dári tapshylyǵy týyndaǵanyn moıyndady. AQSh Qorǵanys mınıstrliginiń bas ınspektory ázirlegen baıandamada Iranmen qaqtyǵys amerıkalyq armııada oq-dári men zamanaýı qarý túrleriniń tapshylyǵyna ákelgeni aıtylǵan, dep habarlaıdy Euronews.
Qaqtyǵys bastalǵan 28 aqpannan 30 maýsymǵa deıin «Epic Fury» operatsııasyna, baǵalaýlar boıynsha, 33,4 mlrd dollar jumsalǵan. Onyń 22,3 mlrd dollary tek oq-dárige ketken.
Kongreske usynylǵan baıandamada qaqtyǵys barysynda qarý-jaraqtyń keń kólemde qoldanylýy «strategııalyq deńgeıde qorlardyń azaıýyna» ákelgeni jáne AQSh qorǵanys ónerkásibiniń arsenaldardy tolyqtyrý múmkindiginde problemalar baryn kórsetkeni aıtylǵan. Sarapshylardyń baǵalaýynsha, joǵary dáldiktegi zymyrandar men qorǵanys júıeleriniń tosqaýyldaýshy zymyran qoryn soǵysqa deıingi deńgeıge deıin qalpyna keltirýge shamamen úsh jyl qajet bolýy múmkin.
Baıandamaǵa qatysty pikir bildirgen AQSh prezıdenti Donald Tramp armııadaǵy oq-dári qory «is júzinde sheksiz» ekenin jáne qarý-jaraq óndirisi rekordtyq deńgeıge jetkenin málimdedi.
Dúısenbi kúni Tramp óziniń Truth Social platformasyndaǵy jazbasynda AQSh «tarıhymyzda buryn-sońdy bolmaǵan asa jetildirilgen ári tańdaýly qarý-jaraq» óndirip jatqanyn aıtty.
Bas ınspektordyń baıandamasynda Irannyń soqqylary saldarynan amerıkalyq áskerı bazalarda aıtarlyqtaı qıraý bolǵany da tirkelgen. Kýveıt, Bahreın, Katar, Birikken Arab Ámirlikteri, Saýd Arabııasy, Irak, Oman jáne Iordanııadaǵy bazalarda júzdegen ǵımarat pen basqa da nysan zaqymdanǵan nemese qıraǵan.
Bul nysandardy jóndeý nemese qalpyna keltirý quny 33,4 mlrd dollarlyq baǵalaýǵa kirmeıdi. AQSh bıligi ázirge zaqymdanǵan nysandardyń barlyǵyn qalpyna keltirý-qalpyna keltirmeý jáne bul jumystardyń shyǵynyn kim óteıtini týraly sheshim qabyldaǵan joq.
Buǵan deıin Tegeran AQSh prezıdentiniń jańa málimdemeleri aıasynda Vashıngtonmen dıalogty qaıta bastaý múmkindigine qatysty ustanymyn bildirgen.
