Pentagon Iranǵa jasalǵan soqqy týraly alǵash ret málimdeme jasady

ASTANA. KAZINFORM – AQSh Qorǵanys mınıstrligi Iranǵa jasalǵan soqqyǵa qatysty alǵashqy resmı málimdemesin jarııalady, dep habarlaıdy Kazinform agenttiginiń Vashıngtondaǵy menshikti tilshisi.

Pentagon basshysy Pıt Hegset AQSh pen Izraıldiń áreketteri Irannyń AQSh qarýly kúshteri men álemdegi amerıkalyq múddelerge baǵyttalǵan kópjyldyq shabýyldaryna jaýap bolǵanyn málimdedi.

– Biz bul soǵysty bastaǵan joqpyz, biraq prezıdent Tramp tusynda ony aıaqtaımyz. Bul rejımdi aýystyrý soǵysy emes, alaıda rejım ózgerýi tıis jáne álem budan utady. «Amerıkaǵa ólim» jáne «Izraılge ólim» dep urandatqan rejım «Amerıkadan ajal» jáne «Izraılden ajal» qushty, – dedi Pıt Hegset.

Onyń aıtýynsha, AQSh-tyń negizgi maqsattary – Irannyń shabýyldaýshy zymyrandaryn, zymyran óndirisin, áskerı-teńiz kúshterin jáne qaýipsizdik ınfraqurylymyn joıý, sondaı-aq eldiń ıadrolyq qarýǵa ıe bolýyna jol bermeý.

Hegset qaqtyǵystyń sozylatyny týraly boljamdardy joqqa shyǵarǵanymen, naqty merzimin de ataǵan joq. Ol Iran aýmaǵynda amerıkalyq qurlyq áskerleri joq ekenin rastady, biraq bolashaq áreketterge qatysty jan-jaqty túsinikteme bermeıtinin aıtty.

– Biz ıran halqy bul múmkindikti paıdalanady degen úmittemiz. Prezıdent Tramp olardyń ýaqyty kelgenin aıqyn jetkizdi, – dedi Pentagon basshysy.

Hegset áskerı qımyldar adam shyǵynyna ákeletinin atap ótti.

– Soǵys – tozaq, bul árdaıym solaı bolady. Biz qaza tapqan tórt amerıkalyqtyń jáne jaralanǵandardyń qurmetine taǵzym etemiz, – dedi ol.

Buǵan qosa, AQSh Qarýly kúshteri shtab bastyqtary birikken komıtetiniń tóraǵasy Den Keın Irandaǵy áskerı maqsattarǵa jetý kúrdeli bolatynyn jáne qosymsha kúsh-jigerdi talap etetinin málimdedi.

Onyń aıtýynsha, operatsııanyń bastapqy kezeńinde Irannyń basqarý jáne baqylaý ınfraqurylymyna, áskerı-teńiz kúshterine, ballıstıkalyq zymyran pozıtsııalaryna jáne barlaý júıelerine soqqy jasalǵan. Bul qarsy taraptyń áreketterin úılestirý jáne jaýap berý múmkindigin shekteýge baǵyttalǵan.

Sondaı-aq Keın áskerı shyǵyndardy baǵalaý úshin ýaqyt qajet ekenin, al bolashaqtaǵy maqsattardy anyqtaý kezinde bul derekter eskeriletinin aıtty.

Buǵan deıin Donald Tramp Iranǵa qarsy aýqymdy áskerı operatsııa bastalǵanyn jarııalaǵan bolatyn.