Pentagon Iranǵa qarsy áskerı operatsııany jalǵastyrý úshin 200 mlrd dollar surap otyr
ASTANA. KAZINFORM - AQSh áskerı vedomstvosy Iranǵa qarsy operatsııany jalǵastyrý úshin 200 mlrd dollardan astam qarjy surady, dep habarlaıdy Kazinform agenttigi.
The Washington Post basylymynyń málimetinshe, Pentagon Aq úıge Kongreske 200 mlrd dollardan astam qarajat bólý týraly ótinish joldaýǵa ruqsat surap júgingen. Alaıda keıbir sheneýnikter bul bastamanyń zań shyǵarýshylar tarapynan qoldaý tabý yqtımaldyǵy tómen ekenin aıtady.
Boljamdy soma qazirgi áýe operatsııasyna jumsalyp jatqan shyǵyndardan edáýir asyp túsedi. Negizgi qarjy sońǵy úsh aptada myńdaǵan nysanaǵa jasalǵan soqqylar barysynda paıdalanylǵan qarý-jaraq qoryn shuǵyl tolyqtyrýǵa baǵyttalmaq.
Basylym derekkózderine súıensek, sońǵy eki apta ishinde Qorǵanys mınıstrligi qarjylandyrýdyń birneshe nusqasyn usynǵan. Alaıda suralatyn qarajattyń naqty kólemi áli túpkilikti bekitilmegen.
Bul bastama AQSh Kongresi ishinde eleýli saıası kelispeýshilikterge sebep bolýy múmkin. Qoǵamdyq qoldaý deńgeıi de shekteýli kúıde qalyp otyr. Demokratııalyq partııa ókilderi usynysty qatań synǵa alsa, Respýblıkalyq partııa jalpy qosymsha qarjylandyrý ıdeıasyn qoldaıdy. Degenmen olar Senattaǵy qajetti daýys sanyn jınaý tetikteri boıynsha ortaq ustanymǵa áli kelgen joq.
Buǵan deıin AQSh prezıdenti Donald Tramp saılaýaldy naýqan kezinde eldiń sheteldik qaqtyǵystarǵa qatysýyn qysqartýǵa nıetti ekenin aıtyp, Ýkraınaǵa bólinetin qarjy shyǵyndaryn synǵa alǵan bolatyn. Amerıkalyq derekterge sáıkes, jeltoqsan aıyna qaraı Kongress bul maqsattarǵa shamamen 188 mlrd dollar bólýdi maquldaǵan.
AQSh Qorǵanys mınıstrligi bul máselege qatysty túsinikteme berýden bas tartty. Al Aq úı ókilderi ázirge BAQ saýalyna jaýap qaıtarmaǵan.
Eske salaıyq, 28 aqpanda AQSh pen Izraıl Iranǵa qarsy operatsııa bastaǵan edi. Aq úı bul qadamdy Iran tarapynan tóngen zymyran jáne ıadrolyq qaýippen baılanystyrdy. Buǵan jaýap retinde Islam revolıýtsııasy saqshylar korpýsy Izraıl aýmaǵyndaǵy jáne aımaqtaǵy amerıkalyq nysandarǵa soqqy jasaǵan.
Aq úıdiń Ekonomıkalyq keńesi basshysynyń málimdeýinshe, AQSh-tyń Iranǵa qarsy áskerı áreketterge jumsaǵan jalpy shyǵyny qazirgi tańda 12 mlrd dollar shamasynda. Pentagon deregine sáıkes, operatsııanyń alǵashqy eki kúnindegi soqqylardyń ózi amerıkalyq salyq tóleýshilerge 5,6 mlrd dollarǵa túsken.