Pentagon Irakty qalpyna keltirýge bólingen 8,7 mıllıard dollardy «joǵaltyp aldy»
ASTANA. Shildeniń 28-i. QazAqparat - AQSh-tyń Federaldyq baqylaýshy organy Irakty qalpyna keltirýge úkimetten alǵan 8,7 mıllıard dollar qarjyny eskermegeni úshin eldiń Qorǵanys mınıstrligin úzildi-kesildi synǵa aldy, dep habarlaıdy RBK agenttigi.
Osylaısha, atalmysh maqsatqa bólingen barlyq qarajattyń 96 paıyzyn qorǵanys vedomstvosynyń joǵaltyp otyrǵany málim etildi. Irak boıynsha Bas federaldyq ınspektordyń aıtýynsha, AQSh úkimeti Irakty qaıta qurý úshin Pentagonǵa 9 mıllıardtan astam dollar bólgen.
Al Qorǵanys mınıstrligindegiler bolsa, «eskerilmegen» aqshanyń joǵalyp ketpegenin, olar boıynsha barlyq málimet muraǵat qujattarynda ekenin aıtyp aqtalýda. Pentagondaǵylar sondaı-aq, muraǵattaǵy ol málimetterdi jarııalaý úshin «biraz kúsh salý kerektigin» aıtyp otyr.
Bul jerde 2004-2007 jyldary alynǵan qarajattar týraly sóz bolyp otyrǵanyn aıta ketý kerek. Bul somanyń qomaqty bóligi amerıkan úkimetine S.Hýseın taǵynan taıdyrylǵannan keıin jaýyp tastalǵan keıbir aktıvterdi, sondaı-aq Iraktyń munaı-gazyn satýdan túsken. Bul qarajatty Pentagon Irakty qalpyna keltirýge jumsaýy kerek edi. Biraq, salǵyrttyqtan ba, álde basqa sebepten de bul qarajattyń qaıda jumsalǵanyn anyqtaý múmkin bolmaı otyr.
