Pentagon ár besinshi general men admıraldy qysqartpaq
ASTANA. KAZINFORM – AQSh-ta qarýly kúshterdegi generaldar, admıraldar jáne olarǵa sáıkes keletin laýazymdardyń jalpy sany shamamen 20%-ǵa qysqartylady. Bul týraly AQSh Qorǵanys mınıstri Pıt Hegset Vırdjınııa shtatyndaǵy Kýantıko teńiz jaıaý áskeri bazasynda sóılegen sózinde málimdedi, dep habarlaıdy TASS.
Onyń aıtýynsha, qazirdiń ózinde qarýly kúshterdiń barlyq túri boıynsha generaldar men admıraldardyń shamamen 10%-y qyzmetten bosatylǵan. Buǵan qosa, generaldyq quramdaǵy laýazymdar sany taǵy 10%-ǵa qysqartylmaq.
– Qysqartý barlyq deńgeı boıynsha 20%-dy quraýy tıis. Qazir buqaralyq aqparat quraldary muny tazartý dep atap júr. Men muny jaýapkershilik dep ataımyn jáne onyń ýaqyty áldeqashan kelgen, – dedi Hegset.
Pentagon basshysy vedomstvo jumysynyń qaǵıdattary da ózgeretinin aıtty. Onyń sózinshe, maqsat – mınıstrliktiń óz mindetterin oryndaý barysynda «ymyrasyz ári tabandy» bolýyn qamtamasyz etý.
Hegset sózinde AQSh qarýly kúshterinde endi «semizder, transgenderler, saqaldy jigitter, álsizder jáne radıkaldar» joq ekenin de málimdedi. Mınıstr «ıdeologııalyq kloýndarǵa» oryn joq ekenin aıtyp, olardyń ornyna patrıot áskerı qyzmetshiler kelgenin jetkizdi.
Aıta keteıik, buǵan deıin hakerler Pentagonnyń kadrlyq derekter ortalyǵyn buzyp, 3 mıllıonǵa jýyq adamnyń jeke málimetterine qol jetkizgeni habarlanǵan edi.
