Pentagon AQSh Sırııanyń Bý-Kemal qalasyna avıasoqqy jasaǵanyn teriske shyǵardy
ASTANA. QazAqparat - AQSh avıatsııasy nemese halyqaralyq lańkestikke qarsy koalıtsııasy Sırııanyń Bý-Kemal qalasynyń (Deır-ez-Zor provıntsııasy) mańynda soqqylar jasaǵan joq. Bul týraly TASS agenttigine AQSh qorǵanys mınıstrliginiń baspasóz qyzmetinen málim etti.
«Biz (AQSh nemese koalıtsııa) Bý-Kemalda avıasoqqylar jasaǵan joqpyz»,- dep jaýap berdi mınıstrlik baspasóz qyzmetiniń ókili, Teńiz áskeri korpýsynyń maıory Adrıan Renkın-Gelloýeı Sana agenttiginiń aqparatyna qatysty pikir bildire otyryp.
Aıta keteıik, Sana agenttiginiń jazýynsha, AQSh basshylyq etken koalıtsııa Bý-Kemal qalasynan ońtústik-shyǵysqa qaraı ornalasqan Sırııa armııasy pozıtsııalarynyń birine áýeden soqqy jasady. Saldarynan zardap shekkender men qaza bolǵandar bar.
2018 jyldyń basynan beri Deır-ez-Zor, Haseke jáne Rakka provıntsııalarynda Sırııanyń ondaǵan azamaty AQSh avıatsııasy men olardyń odaqtastary jasaǵan soqqylar saldarynan qaza taýyp, jaralandy. Sırııa úkimeti beıbit halyqtyń ólimine ákelip jatqan jáne sharýashylyq nysandaryna zalal keltirip otyrǵan koalıtsııanyń avıasoqqylaryn synǵa alý talabymen BUU-nyń Qaýipsizdik Keńesine birneshe márte ótinish bildirgen bolatyn.
