Pentagon 30 jastan asqan áskerılerdiń testosteron deńgeıin jyl saıyn tekseredi
AQSh-ta 30 jastan asqan áskerı qyzmetshilerdiń jyl saıynǵy mindetti medıtsınalyq tekserisine endi testosteron deńgeıin anyqtaý da kiredi. Bul týraly AQSh Qorǵanys mınıstri Pıt Hegset málimdedi.
Onyń aıtýynsha, 30 jasqa deıingi áskerı qyzmetshiler de qalaýy boıynsha osy tekseristen óte alady. Jańa talap turaqty áskerı qyzmette júrgenderge de, rezervtegi áskerı qyzmetshilerge de qatysty bolmaq.
Eger tekserý kezinde testosteron deńgeıiniń tómen ekeni anyqtalsa, em qabyldaý nemese qabyldamaýdy árkim ózi sheshedi.
- Bul bastamanyń maqsaty – áskerı qyzmetshilerdiń kúsh-qýatyn qoldan arttyrý emes. Biz tek aǵzada jetispeıtin gormonnyń ornyn toltyrýdy kózdep otyrmyz, – dedi Pıt Hegset.
Qorǵanys mınıstrliginiń málimetinshe, baǵdarlama áskerı qyzmetshilerdiń dene daıyndyǵyn saqtaýǵa, aýyr júktemege tótep berýine jáne jalpy densaýlyǵyn nyǵaıtýǵa kómektesýi tıis.
Mamandardyń aıtýynsha, jas ulǵaıǵan saıyn er adamdardyń aǵzasyndaǵy testosteron deńgeıi birtindep tómendeıdi. Sondyqtan mundaı tekserister máseleni erterek anyqtap, der kezinde em qabyldaýǵa múmkindik beredi.
– Áskerı qyzmetshiler tek búgin emes, aldaǵy jyldary da óz mindetin tolyq atqara alatyndaı jaǵdaıda bolýy kerek. Sondyqtan olardyń densaýlyǵyna qazirden bastap kóńil bólý mańyzdy, – dedi mınıstr.
Jańa tártiptiń arqasynda ár áskerı qyzmetshiniń densaýlyǵyna qatysty negizgi kórsetkishter jınalady. Bul dárigerlerge qajet bolǵan jaǵdaıda naqty em taǵaıyndaýǵa kómektesedi.
Eske salaıyq, buǵan deıin AQSh Iranǵa qarsy jańa áýe soqqylaryn bastaǵanyn málimdegen edi.
