Pensılvanııada qaıyrymdylyq sharasynda kólik kópshiliktiń arasyna kirip ketip, 17 adam zardap shekti
VAShINGTON. QazAqparat – Pensılvanııa bıliginiń málimetinshe, júrgizýshi bir top adamdy qaǵyp, sodan keıin basqa qaladaǵy áıelge shabýyl jasaǵan. Saldarynan eki adam mert bolyp, 17 adam jaraqat aldy, dep habarlaıdy QazAqparat NBC News-ke silteme jasap.
Polıtsııanyń málimetinshe, 5 tamyzda Lıýtsern okrýginiń Neskopek qalasyndaǵy úıde órt saldarynan qaıtys bolǵan úsh bala men jeti eresek adamnyń otbasylaryna qarajat jınaý úshin Kolýmbııa okrýginiń Bervık qalasynda qaıyrymdylyq is-sharasy ótken. Oǵan jınalǵan 18 adamdy kólik qaǵyp ketken.
Bir adam qaza taýyp, túrli dárejedegi jaraqat alǵan 17 zardap shegýshi tórt aýdandyq aýrýhanaǵa jetkizildi. Olardyń beseýiniń jaǵdaıy aýyr, úsheýiniki qanaǵattanarlyq jaǵdaıda. Jeti adamǵa medıtsınalyq kómek kórsetildi, olar aýrýhanaǵa jatýdan bas tartty.
Osy qylmystan keıin kólik júrgizýshisi Neskopek qalasyndaǵy áıelge shabýyl jasaǵan. Kelinshek oqıǵa ornynda qaıtys bolǵan.
Kúdiktini polıtsııa ustady. Onyń 24 jastaǵy Adrıan Osvaldo Sýra Reıes ekendigi anyqtaldy, oǵan AQSh qylmystyq zańnamasynyń eki baby boıynsha kisi óltirdi degen aıyp taǵyldy.
Polıtsııa adamdardy qaǵyp ketý sebepterin jáne onyń Neskopekte áıeldi óltirý oqıǵasyna baılanysyn zertteıdi.
Vıdeodan alynǵan kadr
