Peleniń 1958 jylǵy ÁCh fınalynda kıgen fýtbolkasy 6 mln dollarǵa satylady
ASTANA. KAZINFORM – Brazılııalyq ańyz fýtbolshy Peleniń 1958 jylǵy álem chempıonatynyń fınalynda kıgen sporttyq jeıdesi aýktsıonda 6 mıllıon dollardan astam somaǵa satylýy múmkin. Bul týraly The Athletic portaly habarlady.
1958 jylǵy álem chempıonaty Shvetsııada ótken. Fınalda Brazılııa ulttyq fýtbol quramasy alań ıeleri – Shvetsııa ulttyq fýtbol quramasyn 5:2 esebimen jeńip, óz tarıhynda alǵash ret álem chempıony atandy. Ol kezde Pele nebári 17 jasta edi jáne sheshýshi kezdesýde eki gol soqty.
Portaldyń málimetinshe, Peleniń fýtbolkasynyń boljamdy quny 6 mıllıon dollardan asady. Saýda-sattyq 29 maýsymda bastalyp, 16 shildede aıaqtalady.
2022 jyly fýtbolshynyń sporttyq kıimine qatysty rekordtyq somaǵa aýktsıon ótken. Sol kezde argentınalyq Dıego Maradonanyń 1986 jylǵy álem chempıonatynda aǵylshyndar qaqpasyna eki gol soqqan kezdegi formasy 9,28 mıllıon dollarǵa satylǵan.
Pele 2022 jyldyń 29 jeltoqsanynda 82 jasynda qaıtys boldy. Ol Brazılııa quramasy sapynda 1958, 1962 jáne 1970 jyldary álem chempıony atandy.
«Santos» klýbynyń oıynshysy retinde Pele Brazılııa chempıonatyn alty ret jeńip aldy. Sondaı-aq eki márte Lıbertadores kýbogy men Qurlyqaralyq kýboktyń ıegeri atandy.
Ol mansabynda 1 279 gol soǵyp, osy kórsetkishi úshin Gınnestiń rekordtar kitabyna engen.
Pele birneshe ret sporttyq basylymdardyń nusqasy boıynsha HH ǵasyrdyń eń úzdik fýtbolshysy atandy jáne ǵasyrdyń sımvolıkalyq quramalaryna engizildi.
1999 jyly FIFA HH ǵasyrdyń úzdik fýtbolshysyn anyqtaý úshin sport sheneýnikteri, jýrnalıster men jattyqtyrýshylar arasynda saýalnama júrgizip, onyń qorytyndysynda Pele birinshi oryn aldy. Alaıda ınternet arqyly ótken jankúıerler daýys berýinde Dıego Maradona jeńiske jetti.
Nátıjesinde FIFA «Ǵasyr oıynshysy» ataǵyn eki fýtbolshyǵa birge berý týraly sheshim qabyldady.
Sol jyly Time jýrnaly Peleni HH ǵasyrdyń eń yqpaldy 100 adamynyń qataryna qosty.
1999 jyly Halyqaralyq Olımpıada komıteti Peleni Olımpıada oıyndaryna eshqashan qatyspaǵanyna qaramastan, ǵasyrdyń eń úzdik sportshysy dep tanydy.
Ol Latyn Amerıkasy aýmaǵynda Olımpıada alaýyn alyp júrgen alǵashqy adam boldy. Bul 2004 jyly Afına Olımpıadasy qarsańynda júzege asty. «Fýtbol koroli» atanǵan Pele Marakana stadıonynan alaýdy alyp shyǵyp, estafetany bastaǵan alǵashqy adam retinde tarıhqa endi.
Aıta keteıik, bıyl Pokemon kartasy aýktsıonda 16,5 mıllıon dollarǵa satylyp, álemdik rekord tirkelgenin jazdyq.
