Pele FIFA-nyń arnaýly kýbogimen marapattaldy

ASTANA. QazAqparat – Halyqaralyq fýtbol federatsııasynyń arnaýly kýbogin aty ańyzǵa aınalǵan fýtbolshynyń jubaıy Marsııa Aokıge Ronaldo tabystady, dep habarlaıdy QazAqparat FIFA saıtyna silteme jasap.

Parıjde ótken The Best FIFA Football Awards™ 2022 saltanatty sharasyn ashyp bergen FIFA prezıdenti Djannı Infantıno óz sózinde Peleni eske aldy.

«Korol – O Reı – Pele. Pele týraly ne aıta alamyz? Pele – fýtbol. Ol endi ortamyzda joq. Qatty saǵynamyz. Alaıda, Pele máńgilik bizben birge bolady. Búgingi saltanatty sharaǵa bizben birge qatysqany úshin Peleniń otbasyna alǵys aıtamyn. Kóp rahmet!» - dedi ol.

FIFA-nyń arnaýly marapatyn Peleniń jubaıy Marsııa Aokıge Brazılııanyń sýperjuldyzy, halyqaralyq federatsııa maqtanyshy Ronaldý tabystady.

Marsııa Aokı fýtboldyń álemdegi barsha fanatyna, oıynshylar men uıymdastyrýshylarǵa alǵys bildirdi.

Eske salsaq, Brazılııalyq ataqty fýtbolshy Pele 82 jasynda ómirden ótti.

Brazılııada fýtbol koroli Peleniń qaıtys bolýyna baılanysty úsh kúndik aza tutý jarııalandy.

Álemdegi buqaralyq aqparat quraldary Peleniń ómirden ótkenin habarlap, onyń fýtbol tarıhyndaǵy ornyn, qandaı adam bolǵanyn jappaı jazdy.