Pedofılııanyń aldyn alý úshin baqylaý kameralaryn ornattyq - Mańǵystaý oblysy ákimi

NUR-SULTAN. QazAqparat - Pedofılderdi anyqtaý úshin qalaǵa baqylaý kameralary ornatyldy. Bul týraly Ortalyq kommýnıkatsııalar qyzmetinde ótken brıfıngte Mańǵystaý oblysynyń ákimi Serikbaı Trumov aıtty, dep habarlaıdy QazAqparat tilshisi.

«Pedofılızm máselesine toqtalaıyn. Shynynda, bul - kúrdeli másele. Bul jóninde tıisti quqyq qorǵaý organdary jumys júrgizip jatyr», - deıdi Serikbaı Trumov.

Onyń aıtýynsha, qalaǵa memlekettik jekemenshik áriptestik arqyly 600 baqylaý kameralary ornatylǵan.

«Bul da osyndaı qylmystardyń aldyn alýǵa múmkindik beredi degen úmittemin. Sońǵy faktige baılanysty aıtar bolsam, beınekameranyń arqasynda osy jaǵdaıdyń bolýyna jol berilmedi. Bul - bizdiń qoǵam bolyp kúresetin másele», - deıdi ol.

Eske sala ketsek, Mańǵystaý oblysynda 91 pedofıl esepte turǵanyn jazǵan bolatynbyz.