Pedofılııa úshin jaza ótegender Qazaqstanǵa kirgizilmeıtin bolady
ASTANA. QazAqparat - Pedofılııa úshin jaza ótegender Qazaqstanǵa kirgizilmeıtin bolady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Bas prokýrorynyń orynbasary Andreı Kravchenko málim etti.
«Birinshiden, kámelettik jasqa tolmaǵandarǵa qatysty seksýaldyq turpattaǵy qylmys jasaǵandarǵa jaza kúsheıtiledi. Ekinshiden, bizdiń kózqarasymyz boıynsha, jazany ótep shyqqan osyndaı qylmyskerlerge qadaǵalaýdy kúsheıtý kerek. Úshinshiden, ınternet keńistikte balalar pornografııasy men olarǵa qatysty seksýaldyq zorlyq-zombylyqtardy nasıhattaıtyn aqparattarǵa shekteý qoıý qajet. Tórtinshiden, shekarany bekemdeýimiz kerek. Bizge osyndaı qylmystary úshin jazaǵa tartylǵan ózge memleketterdiń azamattaryn jáne azamattyǵy joq adamdardy kirgizbeýimiz shart», - dep atap ótti A.Kravchenko.
Onyń aıtýynsha, elde balalardy qatygezdikpen zorlaý jáne ómirlerine balta shabý oqıǵalary úlken alańdaýshylyq týǵyzýda. «Jynystyq qylmystar onyń ishinde kámelettik jasqa tolmaǵandarǵa qatysty qylmystar sany artýda. Máselen, 2010 jyly eger olardyń sany 1885 kóleminde tirkelse, 2014 jyly eki esege ósti jáne 3623 qylmys jasalǵan. Bıyl alty aıdyń ishinde bul qylmystar 20 paıyzǵa kóbeıgen. Eń qatty alańdatyp otyrǵany - kámelettik jasqa tolmaǵandarǵa qatysty jynystyq zorlaý qylmystarynyń artýy. 2010 jyldan beri mundaı qylmystar eki esege ósip, 491-den 2014 jyly 943-ke deıin ulǵaıǵan. Bıyldyń ózinde balalarǵa qatysty zorlyq boıynsha 726 fakti tirkeldi. Byltyr osy merzimde 485 qylmys tirkelgen bolatyn», - dep atap ótti A.Kravchenko.
