Pedofılııa men LGBT-ny nasıhattaýǵa tyıym salynady — zań qabyldandy
ASTANA. KAZINFORM — Parlament Májilisi balalardy densaýlyǵy men damýyna zııan keltiretin aqparattan qorǵaýǵa qatysty jańa normalardy qabyldady.
Atap aıtqanda, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine arhıv isi máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy. Bul qujatta balalardy densaýlyǵy men damýyna zııan keltiretin aqparattan qorǵaý maqsatynda jarııa keńistikte, sondaı-aq mass-medıany, telekommýnıkatsııa jelilerin nemese onlaın-platformalardy paıdalana otyryp, pedofılııany jáne dástúrli emes seksýaldyq baǵdardy nasıhattaıtyn aqparatty ornalastyrýdy shekteý jónindegi normalar kózdelgen.
— Balalar men jasóspirimderdi tsıfrlyq keńistiktegi jaǵymsyz kontentten qorǵaý týraly qoǵamnyń alańdaýyn eskere otyryp, zań jobasyna qoǵamdyq keńistikte pedofılııa men dástúrli emes jynystyq baǵdardy nasıhattaýǵa tyıym salatyn túzetýler engizildi. Balalar men jasóspirimderdiń otbasy, ımandylyq jáne bolashaq týraly túsinigine keri áserin tıgizetin aqparatty kún saıyn jelide kezdestiretinin baıqap otyrmyz. Jas urpaqty zańsyz kontentten qorǵaý — olardyń qaýipsizdigi men psıhıkalyq densaýlyǵynyń máselesi, — dedi Májilis depýtaty Elnur Beısenbaev.
Osy oraıda ol zań jobasyndaǵy mańyzdy norma óskeleń urpaqty jaǵymsyz aqparattardan qorǵaýǵa, jat aǵymdardan saqtaýǵa qatysty ekenin atap ótti.
— Óıtkeni bala — bizdiń bolashaǵymyz, elimizdiń erteńi. Sondyqtan olardyń sanasyn ýlaıtyn, ómirine teris áser etetin zııandy aqparattardan qorǵaý — ortaq mindetimiz. Árıne, tsıfrlyq zamanda aqparattarǵa tolyqtaı tosqaýyl qoıý múmkin emes. Degenmen, zańǵa qaıshy, adamdyqqa jat kontentti shekteý — oryndy is. Óıtkeni áli buǵanasy qatpaǵan, aqyl toqtatpaǵan jasóspirimderdiń túrli aqparatty talǵaýsyz qabyldap, solardyń jeteginde ketip qalýy ábden múmkin. Ondaı oqıǵalar az emes. Sondyqtan usynylyp otyrǵan zań osynyń aldyn alýdy, keleńsizdikterge jol bermeýdi kózdeıdi, — dedi E. Beısenbaev.
Sonymen qatar Májilis depýtaty Edil Jańbyrshın byltyr qoǵam belsendileri E-petition.kz memlekettik platformasynda LGBT nasıhatyna qarsy petıtsııa jarııalap, az ýaqyt ishinde zańdy túrde 50 myń qol jınalǵanyn eske saldy.
— Sondyqtan bizdiń LGBT-ny nasıhattaýdy zańmen shekteý boıynsha qabyldap jatqan normalarymyz keıbir halyqaralyq uıymdar men belsendiler aıtyp júrgendeı eshqandaı adam quqyǵyn shekteýge baǵyttalmaǵan. Kerisinshe, bul normalar dástúrli otbasylyq ınstıtýtty buzýdan jáne balalar men jasóspirimderdi destrýktıvti ıdeologııalardan qorǵap, ulttyq qaýipsizdigimizdi saqtaýǵa, halqymyzdyń rýhanı ımmýnıtetin nyǵaıtýǵa septigin tıgizedi. Derbes memlekettiń ishki isine aralasýǵa, eń bastysy onyń ulttyq zańdaryna qysym kórsetýge eshqandaı uıymnyń quqyǵy joq. Eń bastysy, bul normalar ulttyń múddesin qorǵaýǵa baǵyttalǵan, — dedi E. Jańbyrshın.