Pedofıldikke oqtalǵandarǵa qandaı jaza qarastyrylǵan
ASTANA. KAZINFORM – «Jańa adamdar» eriktiler qozǵalysynyń pedofıldikke barýy múmkin azamattardy áshkereleýdegi belsendiligi kópshilikke aıan. Olar ustap bergenderge polıtsııa qandaı shara qoldanatynyn anyqtap bildik.
Jýyrda eriktiler qozǵalysynyń músheleri osy baǵyttaǵy taǵy bir tájirıbesin iske asyrdy.
– Pedofılderdiń aıqyn belgileri – balanyń senimine kirýge tyrysý, aradaǵy áńgimeni qupııa saqtaý úshin manıpýlıatsııa jasaý jáne onlaın baılanys arqyly shynaıy ómirdegi kezdesýge shaqyrý. Pedofıldikke barýy múmkin kisilerdiń minez-qulyq sıpattamasyn rastaý maqsatynda eksperıment úshin 13 jastaǵy qyzdyń akkaýnty ashyldy. Sondaı nıetti adamdardyń biri birden tabylyp, tabandylyq tanytty. Jyly sóz aıtý, maqtaý, sezimin bildirý, balanyń nazaryn aýdarýǵa tyrysý kóp uzamaı kezdesýge shaqyrýǵa ulasty. Eriktiler oǵan kınorýmde kezdesý uıymdastyryp, kútip aldy, - delingen «Jańa adamdar» eriktiler qozǵalysynyń bizge jiberilgen habarlamasynda.
Qozǵalys músheleri I. atty adamdy ustap, polıtsııaǵa tapsyrǵan. Saryarqa aýdany PB ony alǵashqy esepke alý kitapshasyna tirkedi.
– QR QPK 32-baby 2-tarmaǵynyń talaptaryna saı, QK-de kózdelgen qylmystyq quqyq buzýshylyqtar týraly ister jekeshe aıyptaý isteri bolyp esepteledi. Osy ister boıynsha is júrgizý jábirlenýshiniń shaǵymy boıynsha ǵana bastalady jáne onyń aıyptalýshymen, sottalýshymen tatýlasýyna oraı toqtatylady. Joǵaryda kórsetilgen norma negizinde № 267113030001810 sanymen tirkelgen materıaldy zerdeleı kele, qylmystyq quramy bolmaýyna baılanysty nomenklatýralyq iske № 34/10-5-1810 sanymen qaraýsyz qaldyrylǵanyn habarlaımyz, - delingen polıtsııa jaýabynda.
Aıta keteıik, buǵan deıin tarazdyq belsendiler polıtsııaǵa pedofıldi ustap bergenin jazǵanbyz.
Al, Ózbekstanda pedofılder endi ómir boıyna sottalýy múmkin.