Pedofıldik qylmys qaıtalansa, hımııalyq kastratsııa jazasyn qoldanýǵa bolady - E.Abdrasýlov
ASTANA. QazAqparat - Pedofıldik qylmys qaıtalansa, hımııalyq kastratsııa jazasyna júginýge bolady. Búgin «Eýrazııalyq quqyq qorǵaý ortalyǵy» úkimettik emes uıymynyń ókili Ermek Abdrasýlov Ortalyq kommýnıkatsııalar qyzmetinde ótken brıfıngte osyndaı pikir bildirdi.
Sóz arasynda zańger zańnamany izgilendirý jaǵdaıynda balalarǵa qarsy jynystyq sıpattaǵy qylmysy úshin májbúrli hımııalyq kastratsııa máselesin jan-jaqty qarastyrý qajet ekenin eske saldy. Degenmen, ol bundaı jaza túrin engizý týraly sheshim qabyldaýda asyǵystyq jasaýdyń qajeti shamaly ekenin alǵa tartady.
«Bul rette halyqaralyq tájirıbelerdi zerdelep, qylmysqa qatysty onyń qaıtalanýyn, aýqymyn eskerý kerek. Eger qylmysker osyndaı qylmysty buǵan deıin de jasap, sol boıynsha jazasyn ótep, sosyn ony qaıtadan qaıtalasa, onda árıne, jazanyń sondaı túrin qabyldaý qajet bolatyny anyq», - dedi ol.
Eske sala keteıik, búgingi tańda Bas prokýratýra janyndaǵy jumys tobynda balalarǵa qarsy jynystyq sıpattaǵy qylmysy úshin hımııalyq kastratsııa jazasyn engizý máselesin qarastyryp jatyr. Naqtyraq aıtsaq, Qylmystyq kodekske ondaı qylmysqa barǵandarǵa medıtsınalyq sıpattaǵy májbúrleý sharasyn qoldaný týraly norma usynylǵan. Aıta keterlik taǵy bir jaıt, aǵymdaǵy jyldyń basynan beri balalarǵa qarsy qylmys jasaý faktisi ósip otyr. Máselen, ótken alty aıda osyndaı 665 qylmys tirkelgen, bul ótken jylǵy osy kezeńmen salystyrǵanda 37 paıyzǵa artyq.
Sonymen qatar kámelettik jasqa tolmaǵandarǵa qatysty jynystyq qylmys jasaǵandarǵa jazany qatańdatý, olarǵa qatysty medıtsınalyq kastratsııa qoldaný álemniń biraz elinde, atap aıtqanda, Frantsııa, Belgııa, Polsha, Izraılde qoldanylýda. Al Qazaqstanda sońǵy ýaqytta balalarǵa qatysty zorlyq qylmysy azaımaı otyr.
