Pedofıldi ustaǵan polıtseı: Bar oıym - qylmyskerden aıyrylyp qalmaý boldy
ALMATY. QazAqparat – Almatyda ómirin qaterge tigip, kámelet jasyna tolmaǵan qyzdy zorlaǵan kúdiktini ustaý úshin 13 qabattan sekirgen polıtsııa qyzmetkeri Baqytjan Bákirovtiń erligine kópshilik tánti boldy. QazAqparat tilshisi onyń ózinen oqıǵa qalaı bolǵany týraly áńgimelep berýin surady.
– Baqytjan qaı óńirde dúnıege keldińiz?
– Men 1983 jyly 17 shilde kúni Ońtústik Qazaqstan oblysynyń Jetisaı qalasynda dúnıege keldim. Otbasyndaǵy úsh balanyń úlkenimin. Ózimnen keıin qaryndasym jáne inim bar. Ákem Anýarbek Bákirov maqta zaýytynda ınjener bolyp jumys isteıdi. Anam úı sharýasyndaǵy kisi.
– Bul mamandyqty tańdaýǵa ne túrtki boldy ?
– Kishkentaı kezimnen qylmyskerlermen kúresýdi armandaıtynmyn. Oǵan birden-bir sebep fılmder. Sol kezde polıtseılerdiń, tergeýshilerdiń jumysy týraly kınolardy jıi kórsetetin. Sony tapjylmaı otyryp kóretin edim. Bálkim sol túrtki bolǵan bolar. Óse kele polıtsııa mamandyǵyna degen qyzyǵýshylyǵym arta tústi. Sóıtip arman qýyp Almatyǵa keldim.
– Ózińiz armandaǵan oqý ornyna túse aldyńyz ba?
– Iá. Almatydaǵy Abaı atyndaǵy memlekettik ýnıversıtetiniń zań fakýltetine oqýǵa tústim. Grantqa ilige almadym. Aqyly bóliminde bilim aldym. 2000 jyly túsip, 2005 jyly támamdadym. Oqýymdy bitirgen soń bir jyldaı óz mamandyǵym boıynsha jumys taba almadym. Qurylysta istedim. 2006 jyly elordada polıtsııa qyzmetkerlerine arnalǵan baıqaý jarııalanǵanyn estip, baǵymdy synap kórgim keldi. Nur-Sultanǵa kelip sol baıqaýǵa qujat tapsyryp, baǵyma qaraı «40-shy stantsııasada» ornalasqan ІІM akademııasynyń alǵashqy daıarlyq oqýyn 3 aı oqydym. Osy ýaqyt aralyǵynda biraz tájirıbe jınaqtadym.
– Eńbek jolyńyzdy qaıda bastadyńyz?
– 2006 jyly Almaty qalasy polıtsııa departamenti krımınaldyq polıtsııa basqarmasynyń jedel ýákili qyzmetine ornalastym. Eńbek jolym osy jerde bastaldy. Sodan beri 14 jyl boldy osy qyzmettemin.
–Ómirińizdi qaterge tigip, asa qaýipti qylmyskerdi ustaý úshin 13-shi qabattan sekirgende boıyńyzdy eshqandaı qorqynysh bılemedi me?
– Ol kezde men ómirimdi oılamadym. Maqsatym– qylmyskerden aıyrylyp qalmaý, buıryqty buljytpaı oryndaý boldy. Bizge 11 shildede kúni belgisiz adamnyń Almatynyń Túrksib aýdanyna qarasty aýmaqta úı tonap, 15 jastaǵy qyzdy zorlap ketkeni týraly habar kelip tústi. Jedel ýákilderinen eki top quryldy. Sonyń ishinde men de barmyn.
– Kúdiktini neshe kúnde qolǵa túsirdińizder?
– Kúdiktini tórt kún izdestirdik. Keıin onyń páter jaldap, tyǵylyp jatqanyn anyqtadyq. Birden ony ustaý josparyna kiristik. Men jáne áriptesim jaldanǵan páter ıesimen birge 13-shi qabatqa kóterildik. Qylmyskerdi ustaý úshin santehnıktiń kıimin kıip aldyq. Onyń qosalqy kilti boldy. Áıel ony shaqyryp «qubyrdan sý aǵyp jatqanyn aıtty, jóndeýge santehnıkter keldi» dedi. Ol dálizge shyqty, men oǵan qaraı umtyldym. Ol bólmeniń birine qashyp kirip, ashyq turǵan terezeden sekirip ketti. Bul sekýndta ádette eshteńe oılamaısyń, eń bastysy - qýyp jetý. Sondyqtan men onyń artynan sekirdim. 11-qabatta terassa bar, sol jerge quladyq. Qulaǵan kezde aıaǵymnyń synǵanyn birden sezdim. Sebebi «syrt» etken dybys shyqty. Qylmysker qashý áreketin jalǵastyrmaq boldy. Bar kúsh-jigerimdi salyp, ony ýystan shyǵarmaýǵa tyrystym. Seriktesim kelgenshe kúttim. Ekinshi top úıdi qorshap turǵan edi. Olar ústine kóterilip kelgenshe, pedofıldi jibermeı otyrdyq.
– Qazir densaýlyǵyńyz qalaı?
– Sol aıaǵyma úsh ret operatsııa jasaldy. Qazir shúkir jaqsymyn. Jumysyma oraldym.
– Sizdiń erligińiz elenip, QR Prezıdentiniń Jarlyǵymen ІІ dárejeli «Aıbyn» ordenimen marapattaldyńyz, qandaı sezimde boldyńyz?
– «Aıbyn» ordenin alǵan kezde keremet sezimde boldym. Kez kelgen adam maqtaý, marapatqa usynylsa qýanyshqa keneledi ǵoı. Men de qatty qýandym. Sondaı-aq, bul marapat maǵan úlken jaýapkershilik júktedi.
– Polıtsııa bolý úshin adamnyń boıynda qandaı qasıetter bolý kerek dep oılaısyz?
– Eń aldymen, tózimdi jáne antqa adal bolý kerek. Qyzmetke ornalasqanda biz ant qabyldaımyz. Onda azamattardy qorǵaý bizdiń jumysymyz ekeni kórsetilgen. Ár er azamattyń boıynda jiger, namys bolady. Elimiz ben halqymyzdyń tynyshtyǵy úshin eńbek etýimiz kerek. Eń úlken úlken mártebe osy dep oılaımyn.
– Ózińizdiń otbasyńyz jaıynda aıtyp ótseńiz?
– Kópbalaly ákemin. Jarym Maqpal ekeýmiz 6 bala tárbılep otyrmyz. 4 ul, eki qyzym bar. Úlkeni 10 jasta, kishkentaıy qazir 8 aılyq.
– Suhbatyńyzǵa rahmet!
