Pedofıldi soqqyǵa jyqqan qaraýyl qyzmetinen qýyldy
ASTANA. QazAqparat - Qaraǵandy oblysyna qarasty Sátbaev qalalyq ishki ister organynyń tergeýshi kabınetinde 5 jasar búldirshinge jynystyq sıpattaǵy zorlyq kórsetkenin moıyndaǵan pedofıldi soqqyǵa jyqqan qaraýyl qyzmetinen qýyldy, dep habarlaıdy QazAqparat.
Tergeý barysyndaǵy beınematerıalda pedofıl búldirshin qyzǵa zorlyq kórsetý úshin ony aldaǵandyǵyn moıyndaıdy. Ol óz kinásin moıyndaǵannan keıin tergeý amaldary aıaqtalyp, tergeýshi qujattaryn alyp kaıbetteni shyǵyp ketedi. Al bólmede kúdiktimen birge qalǵan serjant laýazymyndaǵy qaraýyldardyń biri ózin ustaı almaı kúdiktini soqqyǵa jyǵady.
Osydan keıin Qaraǵandy oblystyq ishki ister departamentiniń basshylyǵy ókilettigin asyra paıdalanǵan qaraýyldy qyzmetten bosatý týraly tapsyrma beredi.
«Tergeý amaldary aıaqtalǵannan keıin tergeýshi bólmeden shyǵyp ketti. Qaraýyldardyń biri qol jumsady. Polıtsııa serjantyna qatysty Qylmystyq kodekstiń «Bılikti nemese laýazymdyq ókilettigin asyra paıdalaný» 362-baby boıynsha sotqa deıingi tergeý amaldary bastaldy. Ol ishki ister organdarynan shyǵarylyp, tutqynǵa alyndy», - dedi óńirdiń ishki ister departamenti baspasóz qyzmetiniń jetekshisi Baqytjan Qudııarov.
Sonymen qatar qaraýyl qyzmetiniń tikeleı basshylyǵy da ujymdaǵy tártiptiń nasharlyǵy degen jeleýmen tártiptik jazaǵa tartylǵan. Munan bólek, qaraýyl tarabynan mundaı áreketke jol bergen tergeýshi de tergeý amaldarynan shettetilip otyr. Sol sebepti bul is basqa tergeýshige tabystaldy. Al kúdikti medıtsınalyq kómekke muqtaj emes.
Qaraǵandydaǵy QazAqparattyń arnaýly tilshisi zardap shekken qyzdyń týysynan pikir alyp úlgerdi. Ol polıtsııa qyzmetkeriniń durys áreketke barǵanyn aıtýda.
«Ol adam kúdikti bolǵanymen onyń kinási dáleldenip otyr. Balany zorlaǵanyn ózi de moıyndaǵan. Tipti, ol istegen isine ókinedi de. Qorqyp qalǵan, jylap otyrǵan qyzdy polıtsıeıler bólmelerdiń birinen taýyp alǵan. Mundaı sumyraılardy endi qalǵany bálsindirý me? Ol balanyń ómirine balta shaýyp otyr. Mundaı sanattaǵy qylmystarǵa qashan qatań jaza bolmaq?», - dedi týysy.
