Pedofılderge túrmeden shyqqanǵa deıin kastratsııa jasalmaq

ASTANA. KAZINFORM — Densaýlyq saqtaý mınıstriniń «Medıtsınalyq sıpattaǵy májbúrleý sharasyn qoldaný qaǵıdalaryn bekitý týraly» buıryǵyna ózgertýler engizilmek.

Onda pedofılderge túrmeden shyǵarmaı turyp hımııalyq kastratsııa jasaý kózdelgen.

— Mekeme ákimshiligi hımııalyq kastratsııany bosatýdan alty aı buryn qoldaný jáne materıaldardy jazasyn óteý merzimi aıaqtalǵanǵa deıin on eki aıdan keshiktirmeı olardyń psıhıkalyq aýytqýlary men jynystyq zorlyq-zombylyqqa beıimdiliginiń bolýy (bolmaýy) týraly máseleni sheshý maqsatynda sot-psıhıatrııalyq saraptama taǵaıyndaý úshin sotqa jiberý týraly túzetý engizedi, — delingen «Ashyq NQA» portalynda jarııalanǵan buıryq jobasynda.

Qujat 18 tamyzǵa deıin qoǵamdyq talqylaýǵa shyǵarylyp otyr.

Aıta keteıik, elimizdiń Іshki ister mınıstrligi pedofılderdi ómir boıy baqylaýǵa almaqshy.