Pedofılderge qatysty qatań jaza qoldanatyn mezgil jetti - M. Altynbaev
ASTANA. 20 maýsym. QazAqparat - Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Muhtar Altynbaev pedofılderdi qatań jazalaıtyn zań qabyldaý máselesin kóterdi.
Senator sońǵy jyldary jasóspirim balalarǵa qarsy jasalynyp jatqan arsyz, adamı qasıetke jat qylyqtar qoǵamda beleń alyp, halyqtyń narazylyǵyn týǵyzyp otyrǵanyn atap ótti.
«Halyqtyń narazylyǵyn týǵyzyp otyrǵan másele - bul kámeletke tolmaǵan balalarǵa qııanat jasaýshylarǵa taǵaıyndalatyn jazanyń jeńildigi. Osyndaı qylmystar jasap júrgen arsyzdarǵa memleket tarapynan jeńil dárejede jaza taǵaıyndalyp jatqandyǵy buqara halyqtyń ashýyn týǵyzyp, bizge kóptegen hattar kelýde», - deı kele senator aıýandyq áreketten jábir kórgen balalardyń quqyǵy taptalyp jatyr dep esepteıtinin atap ótti.
«Sebebi, eń aldymen ol balalardyń psıhıkasy buzylatyny sózsiz. Ekinshiden, ol balanyń ómirine, keleshegine óshpes daq túsedi.Qoǵamnan oqshaýlanyp, ózin-ózi yńǵaısyz sezinedi. Qııanat kórgen balalardyń ózderine qol jumsap jatqandary qanshama? Keıbir shet memleketterde osyndaı qylmys jasaýshylarǵa esh aıaýshylyq joq, zańmen qatań jazalanady. Mysaly, Iran, Ońtústik Koreıa, Irak, Saýd Arabııasynda kámeletke tolmaǵandarǵa qatysty jasalǵan jynystyq sıpattaǵy qylmystar úshin ólim jazasy kózdelgen. Keıbir elderde pedofılderge qatysty hımııalyq kastratsııa jasaý máselesi qaralyp jatyr», - dedi M. Altynbaev.
Senatordyń sózine qaraǵanda, resmı málimetter boıynsha on alty jasqa tolmaǵan adammen jynystyq qatynasta bolý jáne nápsiqumarlyq sıpattaǵy ózge de is-áreketter jasaý qylmystary 2011 jyly 148 bolsa, 2012 jyly mundaı qylmystar 232-ge, al aǵymdaǵy jyldyń 5 aıynyń ózinde 181-ge jetken.
«Qarap otyrsaq, kámeletke tolmaǵandarǵa qatysty jasalyp jatqan qylmystar elimizde jyldan jylǵa erekshe qarqynmen ósip keledi. Osy aıtylǵan sandardyń artynda qanshama balanyń quqyǵy taptalyp, kúızeliske ushyrap jatqandyǵy, neshe ata-ananyń kóz jasy tógilip otyrǵandyǵy aıtpasa da túsinikti. Halyqtyń narazylyǵyn, ashýyn, yzasyn týǵyzyp otyrǵandyǵy zańdy. Sol sebepti, kámeletke tolmaǵandarǵa qatysty qylmystar úshin jaýapkershilikti túbegeıli kúsheıtip, pedofılderge qatysty óte qatań jaza qoldanatyn mezgil jetti dep esepteımiz», - dedi senator M. Altynbaev.
