Pedofılderge hımııalyq kastratsııa jazasyn qoldaný tártibi kúshine endi
ASTANA. KAZINFORM — Búginnen bastap Qazaqstanda pedofılııa qylmysyn jasaǵan adamdarǵa hımııalyq kastratsııa jazasyn qoldaný tártibi kúshine endi.
Bul ózgeris QR Densaýlyq saqtaý mınıstriniń buıryǵymen bekitilgen «Májbúrli medıtsınalyq sıpattaǵy sharalardy qoldaný qaǵıdalaryna» engizilgen túzetýler aıasynda júzege asady. Jańa ereje boıynsha, hımııalyq kastratsııa psıhıatrııalyq nemese ambýlatorııalyq medıtsınalyq uıymdarda sot sheshimine sáıkes júrgiziledi.
«Sottalǵan adamdy bosatýǵa alty aı qalǵanda, túzetý mekemesiniń ákimshiligi sot-psıhıatrııalyq saraptama taǵaıyndaý úshin materıaldardy sotqa joldaıdy. Saraptama qorytyndysy negizinde hımııalyq kastratsııa qoldaný týraly sheshim qabyldanady» delingen mınıstrlik habarlamasynda.
Hımııalyq kastratsııa 18 jastan asqan, pedofılııalyq sıpattaǵy qylmys jasaǵan tulǵalarǵa ǵana qoldanylady. Bul shara sottyń zańdy kúshi bar sheshimimen ǵana júzege asyrylady jáne psıhıkalyq aýytqýy bar adamdarǵa qoldanylmaıdy.
Mınıstrlik dereginshe, keıingi eki jylda elde 96 adamǵa osyndaı shara taǵaıyndalǵan:
- 2023 jyly - 40 adamǵa
- 2024 jyly - 56 adamǵa.
Kamıla Múlik