Pedofılderge hımııalyq kastratsııa túrmeden shyǵýyna alty aı qalǵanda júrgiziledi

ASTANA. KAZINFORM – Densaýlyq saqtaý mınıstri májbúrli medıtsınalyq sıpattaǵy sharalardy qoldaný qaǵıdalaryna ózgerister engizýdi kózdeıtin buıryqqa qol qoıdy.

Jańa erejelerge sáıkes:

• qaǵıdalarda májbúrli medıtsınalyq sıpattaǵy sharanyń hımııalyq kastratsııa túrinde qoldanylýy naqty belgilendi;
• hımııalyq kastratsııa kámeletke tolmaǵandarǵa qatysty jynystyq qolsuǵýshylyq qylmys jasaǵan, 18 jastan asqan adamdarǵa ǵana taǵaıyndalady jáne ol zańdy kúshine engen sot sheshimi negizinde júrgiziledi;
• shara jazasyn óteý ornynda nemese ambýlatorııalyq psıhıatrııalyq kómek kórsetetin densaýlyq saqtaý uıymynda iske asyralady;
• sottalǵan adamdy bosatýǵa alty aı qalǵanda túzeý mekemesiniń ákimshiligi sot-psıhıatrııalyq saraptama taǵaıyndaý úshin materıaldardy sotqa joldaıdy, bul onyń psıhıkalyq aýytqýy men jynystyq zorlyqqa beıimdiligin anyqtaý úshin júrgiziledi;

Atalǵan normalar esi durys dep tanylǵan, biraq psıhıkalyq aýytqýy bar sottalǵandarǵa qoldanylatyn medıtsınalyq sıpattaǵy sharalarǵa taralmaıdy.

Buıryq 2025 jylǵy 17 qazanda kúshine enedi.

Densaýlyq saqtaý mınıstrligi hımııalyq kastratsııany qoldaný tártibiniń ózgeretini týraly bıyl tamyzda habarlaǵan edi.

Densaýlyq saqtaý mınıstrliginiń deregine sáıkes, sońǵy 2 jylda, naqty aıtqanda 2023 jyly – 40, al 2024 jyly 56 adamǵa hımııalyq kastratsııa taǵaıyndalǵan. Búginde hımııalyq kastratsııany 53 adam alady.