Pedofılderdi qylmystyq jazalaý keshendi túrde kúsheıtildi – Máýlen Áshimbaev
NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynyń jekelegen erejelerin iske asyrý máselesi boıynsha ózgerister men tolyqtyrýlar engizý týraly» zań jobasy ekinshi oqylymda talqylandy. Qujatqa tolyqtyrýlar engizilgendikten, zań jobasy Májiliske qaıtaryldy, dep habarlaıdy QazAqparat tilshisi.
Zań jobasy Memleket basshysynyń 2020 jylǵy 1 qyrkúıekte jarııalanǵan «Jańa jaǵdaıdaǵy Qazaqstan: ic-qımyl kezeńi» atty Qazaqstan halqyna Joldaýyn iske asyrý maqsatynda ázirlengen.
Qujatty ázirleýdiń negizgi maqsaty - memlekettik basqarý salasyndaǵy zańnamany odan ári jetildirý, kámeletke tolmaǵandarǵa qatysty seksýaldyq sıpattaǵy qylmystar úshin jazany qatańdatý, kvazımemlekettik sektordaǵy sybaılas jemqorlyqqa qarsy is-qımyl, suıytylǵan munaı gazy naryǵynda básekelestikti damytý.
Zań jobasynda jaýapty hatshylardyń ókilettikterin mınıstrlikter apparattary basshylaryna júkteý; kámeletke tolmaǵandarǵa qatysty seksýaldyq sıpattaǵy qylmystar úshin jazany qatańdatý; kvazımemlekettik sektor qyzmetkerlerinde qos azamattyq anyqtalǵan kezde jáne sybaılas jemqorlyq qylmys jasaǵany úshin olarǵa qatysty eńbek shartyn buzý; monopolııaǵa qarsy organmen kelisý boıynsha elektrondyq saýda alańy arqyly satylatyn gaz kólemin belgileý kózdelgen.
Zań jobasyn talqylaý barysynda Senat depýtattarynyń eskertýleri men usynystaryn eskere otyryp, Májilis maquldaǵan zań jobasyna tolyqtyrýlar engizý qajettigi týyndady. Máselen, QR Qylmystyq-protsestik kodeksine kámeletke tolmaǵandardyń jynystyq tıispeýshiligine qarsy asa aýyr qylmys boıynsha sotta isterdi qaraýdy alqabılerdiń qatysýynsyz sýdıanyń jeke-dara júzege asyrýyn kózdeıtin túzetýler engizý usynyldy.
«Qujatty ekinshi oqylymǵa daıyndaý kezinde zań jobasyna tolyqtyrýlar engizý qajet boldy. Memleket basshysynyń Joldaýynda kámeletke tolmaǵandarǵa qatysty jynystyq sıpattaǵy qlymystar úshin jazany kúsheıtý mindeti kórsetilgen. Túzetýler osy sanattaǵy isterdi kásibı sýdıalardyń jalǵyz qaraýyn kózdeıdi», - dedi depýtat
Qanatbek Safınov.
Zań jobasy qaralǵannan keıin engizilgen túzetýleri bar qujat Májiliske jiberildi.
«Bul zań jobasynda birqatar mańyzdy ózgerister qarastyrylǵan. Memleket basshysynyń tapsyrmasy boıynsha elimizde balalardy qorǵaý salasynda naqty jáne júıeli saıasat júrgizilip keledi. Osy shara aıasynda pedofılderdi qylmystyq jazalaý keshendi túrde kúsheıtildi», – dedi Senat tóraǵasy Máýlen Áshimbaev.
