Pedofılder Qazaqstanǵa kire almaıtyn bolady - Bas prokýratýra

ASTANA. QazAqparat - TMD elderi kelesi jyly qylmysqa boı aldyrǵan azamattardyń biryńǵaı bazasyn engizedi. Bul týraly búgin xalyqaralyq forýmda QR Bas prokýrordyń orynbasary Andreı Kravchenko málim etti.

«Qandaı da bir qylmys jasaǵan azamatty el shekarasynan ótkizbeı tastaý -qoldan keletin shara. Ol úshin tıisti aqparatqa ıelik etýimiz kerek. Qazirgi ýaqytta biz áriptestermen birge qylmysqa boı aldyrǵan azamattardyń biryńǵaı bazasyn jasaqtaýdy qolǵa aldyq. Shekarada, áýejaılar men vokzaldarda shekara qyzmeti bar, olar sondaı adamdardy anyqtap, ol adamdardyń bizdiń shekaradan ótýine jol joq ekendigin jetkizedi», - deıdi A Kravchenko.

Onyń sózine qaraǵanda, ol úshin shetel áriptesterinen málimetter bazasyndaǵy aqparatty alýy tıis.

«Menińshe, TMD elderiniń biryńǵaı bazasyna kelesi jyly qol jetkize alamyz. Shekara qyzmetinde eger qandaı da bir azamattyń Qazaqstanǵa kirýine shekteý qoıylǵanyn anyqtasa, esh túsindirme bermesten, oǵan shekaradan ótýine ruqsat bermeýine quqyǵy bar. Bul, árıne, qylmys jasaǵan, zań buzǵan, bunyń aldynda Qazaqstannan shyǵarylǵan azamattarǵa qatysty. Nemese shetelde qylmys jasaǵan, qylmystyq ispen aınalysýshy tulǵalarǵa da baılanysty», - dep atap ótti A. Kravchenko.

Onyń aıtýyna qaraǵanda, osy turǵyda, Qazaqstanǵa pedofılderdiń enip ketpeýine erekshe mán berilmek.

«Ol aqparatty biz ishinara Interpoldan da alyp otyrmyz. Eger biz bul azamattyń kámelettik jasqa tolmaǵandarǵa qatysty zorlyq-zombylyq jasaǵanyn, sonyń ishinde seksýaldyq sıpatta zorlyq istegenin anyq biletin bolsaq, Qazaqstannyń shekara qyzmeti ol azamatty Qazaqstanǵa kirgizbeıdi», - dep túıdi sózin A. Kravchenko.