Pedofılden zorlyq kórgen 6 jasar aqtaýlyq qyz qaıtys boldy
ASTANA. QazAqparat - Ana men bala ulttyq ǵylymı ortalyǵynyń balalar anestezıologııasy jáne jan saqtaý bóliminde aýyr halde jatqan 6 jastaǵy búldirshin qyz qaza tapty. Bul týraly «University Medical Center» korporatıvtik qorynyń PR-menedjeri Danııar Meńlibekov málim etti, dep habarlaıdy «QazAqparat».
Eske sala keteıik, 20 tamyzda Aqtaýda alty jasar qyz joǵalyp ketken bolatyn. Birneshe saǵattan keıin polıtseıler balany óndiristik aımaq aýdanynan tapqan edi. Denesinde kóptegen jaraqaty bolǵan kishkentaı qyzdyń zorlanǵandyǵyn dárigerler anyqtaǵan. Osydan keıin QR QK 120-babymen qylmystyq is qozǵaldy.
27 tamyzda alty jasar qyz Mańǵystaý oblystyq balalar aýrýhanasynan sanavıatsııamen Astanaǵa jetkizildi. 6 qyrkúıekte Aqtaý polıtseıleri 6 jasar qyzdy zorlaýǵa qatysty kúdiktini ustady. Ol óz kinásin moıyndady. Tergeý barysynda onyń qyzdy zorlaǵanyn genetıkalyq saraptama da rastaǵandyǵy aıtyldy.
Búldirshin qyz Ana men bala ulttyq ǵylymı ortalyǵynyń balalar anestezıologııasy jáne jan saqtaý bóliminde jatty. Nevrolog, balalar gınekology, pýlmonolog, okýlıst, nefrolog, endokrınolog, hırýrg sııaqty beıindi mamandardyń qatysýymen birneshe márte konsýltatsııa uıymdastyryldy. Sonymen qatar, telemedıtsına arqyly Kembrıdj ýnıversıteti (Ulybrıtanııa) jáne Vena ýnıversıtetiniń (Avstrııa) professorlarymen keńes ótkizilgen edi.
