Pedıatrlardyń jeke qabyldaýyn jandandyrý Úkimette qaralady
Bul týraly búgin Parlament Májilisindegi Úkimet saǵatynan keıin QR Densaýlyq saqtaý jáne áleýmettik damý mınıstri Tamara Dúısenova málim etti, dep habarlaıdy QazAqparat.
«Densaýlyq saqtaý qyzmetkerleri ókilderinen, ǵalymdar, rektorlardan quralǵan úlken jumys toby qurylǵan bolatyn jáne olardyń jumysy aıaqtalýǵa jaqyndady. Olar óńirlerdi aralap, aýdandarda pedıatrııalyq qyzmetterdiń jaǵdaıymen tanysty. Atap aıtqanda, aýdandar men qalanyń óz erekshelikteri bar. Osy rette 15 qarashaǵa qaraı jumys toby sońǵy qorytyndy usynysyn jasaıdy. Budan keıin basqa memlekettik organdardaǵy áriptesterimizben birge Úkimette qarastyratyn bolamyz»,-dedi mınıstr.
Esterińizge sala keteıik, bıylǵy 20 qyrkúıekte ótken Úkimet otyrysynda Tamara Dúısenova jyldyń sońyna deıin qazaqstandyq emhanalarda balalardy pedıatrlardyń jekeleı qabyldaýy qaıta jandanatynyn aıtqan bolatyn.
Osy oraıda ol ol búginde emhanalarda balalardy pedıatrlardyń bólek qabyldaýy baǵytyn qaıta jańǵyrtý máselesi qarastyrylyp jatqandyǵyn, sondaı-aq jyl sońyna deıin bul másele sheshimin tabatynyn atap ótti.
Budan buryn habarlaǵandaı, Bala quqyqtary jónindegi ýákil, QR Parlamenti Májilisiniń depýtaty Zaǵıpa Balıeva bilim berý júıesine pedıatrııa ınstıtýtyn jandandyrý boıynsha belsendi jumystar júrgizip jatqandyǵyn aıtqan bolatyn. Medıtsınalyq joǵary oqý oryndarynyń úderisi jetildirilgenin eske salyp ótken ol, osy rette pedıatrııa fakýlteti emdeý fakýltetimen biriktirilgenin atap ótti.
Bul turǵyda Qazaqstan Respýblıkasyndaǵy Bala quqyqtary jónindegi ýákil retinde Z. Balıeva osymen kelispeıtinin jetkizdi. Onyń paıymynsha, kez kelgen pedıatr eresek adamǵa em-dom jasasa da, alaıda terapevt balany emdeı almaıdy. Sebebi, sábıdiń aǵzasy eresek adamnan ózgeshe bolǵandyqtan, bul baǵytta tıisti qadamdar bolýy tıis.