Pedıatrııa ortalyǵynyń mamandary jańa týǵan nárestege kúrdeli ota jasady
NUR-SULTAN. QazAqparat - Pedıatrııa jáne balalar hırýrgııasy ǵylymı ortalyǵynyń mamandary týa bitti isikti alý boıynsha jańa týǵan nárestege kúrdeli ota jasady, dep habarlaıdy QazAqparat tilshisi.
«Segizkóz-quıymshaq teratomasynyń alyp isigi jatyr ishinde 19 aptalyq kezde anyqtalǵan. Sondyqtan, sábı dúnıege kele salysymyn perzenthanadan Pedıatrııa jáne balalar hırýrgııasy ǵylymı ortalyǵyna jetkizildi. 3818 gr salmaqtaǵy jańa týǵan nárestege hırýrgııalyq ota týǵan ýaqytynan keıin 3-shi kúni jasaldy. Oǵan deıin sábıdiń densaýlyǵyna baılanysty arnaıy emdik-daıyndyq qajet etildi. Kúrdeli ota 3 saǵatqa jalǵasyp, sátti ótti. Otany Pedıatrııa ortalyǵynyń bilikti dárigeri, hırýrg-neonatolog Lıtosh Vladımırdiń jetekshiligimen óz isiniń bilgir mamandarynan quralǵan komanda jasady», - dep atap ótedi atalǵan ortalyqtan.
Kishkentaı patsıent otadan keıingi 3-shi kúni reanımatsııa bóliminen neonatologııa bólimine palataǵa anasynyń janyna aýystyryldy.
«Bul jaǵdaıdyń kúrdeliligi kólemi úlken isiktiń jatyr ishinde qarqyndy ósip, bosandyryp alý jáne isiktiń ózin alyp tastaý kezinde qıyndyqtar týdyrýynda boldy. Sondaı-aq isikte teriniń erozııaǵa ushyraǵan jerleri de bolyp, tik ishekti qysyp jáne qan tamyrlarynan qannyń joǵary deńgeıde júrýine baılanysty belsendi soǵýy qannyń kóp ketý táýekelin týǵyzdy. Іsiktiń jalpy salmaǵy 1028 gr qurady. Qazirgi ýaqytta náresteniń jaǵdaıy turaqty, anasymen birge palatada. Sábıdiń tezirek saýyǵyp ketýin tileımiz!», -dep atap ótedi ortalyqtyń baspasóz qyzmeti.
