Pedıatrııa ınstıtýty men Respýblıkalyq qan ortalyǵy dırektorlarynyń orynbasarlary qyzmetterinen bosatyldy

Bul týraly búgin leıkemııamen aýyratyn balalardyń gepatıttiń «S» vırýsyn juqtyrý faktisine qatysty arnaıy Komıssııa júrgizgen tekseristiń nátıjelerine arnalǵan baspasóz máslıhatynda QR Densaýlyq saqtaý mınıstri Jaqsylyq Dosqalıev málim etti, dep habarlaıdy QazAqparat.

J.Dosqalıevtiń aıtýynsha, búgin mınıstrlikte jumys komıssııasynyń otyrysy ótip, onda Respýblıkalyq qan ortalyǵynda epıdemıologııalyq jaǵdaı úshin jaýapty dırektordyń orynbasaryn jáne Pedıatrııa ınstıtýty dırektorynyń emdeý-aldyn alý máselelerin qadaǵalaýshy orynbasaryn qyzmetterinen bosatý týraly sheshim qabyldanǵan.

Al atalǵan eki Ortalyqtyń basshylary qyzmetterine taǵaıyndalǵanyna jarty jyl ǵana bolǵandyǵy eskerilip, olarǵa qatań sógis túrinde tártiptik jaza qoldanyldy. «Bir aıdyń ishinde Komıssııa anyqtaǵan kemshilikter joıylmasa, bul basshylarmen de qoshtasatyn bolamyz», - dep qadap aıtty ol.