Pedagogtyń quqyqtary men mindetterin zań júzinde bekitý mańyzdy - mektep dırektory
QOSTANAI. QazAqparat - Qostanaı qalasyndaǵy №1 mektep-lıtseıiniń dırektory Sánııa Sháripova pedagogtyń erekshe mártebesi, onyń quqyqtary men mindetterin bekitý qajettiligi týraly pikirin bildirdi. Bul týraly QazAqparat tilshisi habarlaıdy.
Kóp jyldyq eńbek ótili bar pedagogtyń atap ótýinshe, talqylanyp otyrǵan zań jobasy - barlyq muǵalimder qaýymy úshin kópten kútken oqıǵa. «Bul qanshama ret talqylanyp, kóp usynystar jasalǵan másele. Salystyra tekserilgen, jan-jaqty pysyqtalǵan qazirgi zań jobasy bilim jáne eńbek kodeksi týraly zań negizderin jınaqtady. Ol kóbine jas muǵalimderge joldanǵan. Ondaǵy pozıtıvti sátterdiń biri - áskerge shaqyrylý merzimin uzartý. Muǵalim bolyp kóbine áıel adamdar qyzmet etetini qupııa emes, bul salada jas er azamat mamandar az. Ózimiz de osyndaı jaǵdaıǵa tap bolǵanbyz. Mektebimizge jas maman psıholog bolyp jumysqa ornalasty. Bir jyl qyzmet etip, oqýshylarmen de, ata-analarymen de jaqsy baılanys ornatyp úlgerdi. Jumysynyń jaqsy nátıjelerin kórsete bastaǵanda, ásker qataryna shaqyrtyldy. Zań jobasyna áskerge shaqyrý merzimin uzartý boıynsha engizilgen jańalyqtar jas mamandarǵa óz áleýetin iske asyrý mumkindigin berip otyr», - deıdi Sánııa Sháripova.
Ol sondaı-aq tálimgerlik úshin aqy tóleý jospary engiziletinin atap ótti.
Pedagogtyń pikirinshe, bul zań jobasy qoǵam úshin de mańyzdy. Sebebi Sánııa Sháripovanyń aıtýynsha, pedagogtyń moraldyq, zań turǵysynan qorǵalýy jaǵynan kóptegen ózekti máseleler jınaqtalǵan.
«Qazirgi kezde ustazdardy mektep oqýshylaryna qalaı bilim berý, olarmen qalaı sóılesý kerek ekenin úıretkisi keletin adamdar óte kóp. Al buryn ustaz aıtqan sózdiń salmaǵy bar edi. Sondyqtan búginde pedagogtyń erekshe mártebesin, onyń quqyqtary men mindetterin zań júzinde bekitý mańyzdy bolyp tabylady», - dep túıindedi ol.
Avtory: Janna Musabaeva
