Pedagogterge qurmetsizdik tanytqandar jaýapkershilikke tartylady
ASTANA. KAZINFORM – Jańa oqý jylynyń qarsańynda QR Oqý-aǵartý mınıstri Ǵanı Beısembaev oblys ákimderiniń orynbasarlarymen, qala jáne aýdan ákimderimen, sondaı-aq bilim basqarmalary men bólimderiniń basshylarymen keńes ótkizdi.
Kezdesýde QR «Pedagog mártebesi týraly» Zańynyń oryndalýy talqylandy. Keńeste mınıstr memleket tarapynan bilim berý júıesin damytý, pedagogterdi qoldaý jáne balalardyń quqyqtaryn qorǵaý boıynsha aýqymdy sharalar qabyldanyp jatqanyn atap ótti.
– Memleket basshysy respýblıkalyq tamyz konferentsııasynda muǵalimderdiń quqyqtaryn qorǵaý, pedagogterge óz qyzmetine sáıkes kelmeıtin mindetterdi júktemeý týraly erekshe atap ótti. Jergilikti atqarýshy organdarynyń tarapynan zań óreskel buzylǵan jaǵdaıda, prokýratýra organdary aralasýy tıis. Sondaı-aq balalarǵa qatysty bolǵan qaıǵyly oqıǵalar úshin de muǵalimderdi jazalaý – orynsyz, – dedi Ǵanı Beısembaev.
Sońǵy jyldary jaǵdaı edáýir jaqsarǵan. 2020 jylmen salystyrǵanda zańbuzýshylyqtar sany úsh ese azaıdy. Alaıda bilim salasynda sapany qamtamasyz etý komıtetiniń tóraǵasy habarlaǵandaı, bul másele keıbir óńirlerde áli de saqtalyp otyr. Eń jıi kezdesetin jaǵdaılar – muǵalimderdi óz mindetinen tys jumystarǵa tartý, olardyń ar-namysyna tııý, bılet satyp alýǵa nemese túrli is-sharalarǵa qatysýǵa májbúrleý. Keńes barysynda jergilikti atqarýshy organdardyń basshylaryna Memleket basshysynyń tapsyrmasymen 2019 jyly qabyldanǵan QR «Pedagog mártebesi týraly» Zańynyń negizgi normalary jan-jaqty túsindirildi.
Bul zańda muǵalimderdiń júktemesin azaıtý, negizsiz tekserýler men pedagogke tán emes fýnktsııalarǵa jol bermeý, sondaı-aq jaýapkershilikke tartýdyń quqyqtyq tetikteri qarastyrylǵan. Atap aıtqanda, pedagogterge qurmetsizdik tanytqandar QR Ákimshilik quqyq buzýshylyq týraly kodeksiniń 409-baby boıynsha ákimshilik jaýapkershilikke tartylady.
Sonymen qatar zańda pedagogterdiń negizgi mindetteri naqty aıqyndalǵan. Olardyń qatarynda sapaly bilim berý men tárbıeleý, balanyń quqyqtaryn qurmetteý, pedagogıkalyq etıkany saqtaý, kásibı quzyrettiligin únemi jetildirý jáne balalardyń qaýipsizdigin qamtamasyz etý bar.
Keńesti qorytyndylaı kele, mınıstr muǵalimdi qorǵaý arqyly biz balanyń sapaly bilim alý quqyǵyn qamtamasyz etetinimizdi atap ótti. Barlyq memlekettik organ «Pedagog mártebesi týraly» zańdy oryndaýǵa mindetti.
Bul rette óńirlik bilim basqarmalary men aýmaqtyq departamentter zań talaptaryn túsindirýmen qatar, olardyń naqty oryndalýyn qamtamasyz etýi tıis. Bilim berý salasynda zańdylyq pen tártipti saqtaý barshaǵa ortaq ári mindetti talap bolýy qajet.
Aıta keteıik, «Pedagogıkalyq ıdeıalar panoramasy — 2025» baıqaýynyń aıaqtalýyna 1 apta qaldy.
Jańa oqý jylynda 30 myńnan astam pedagog biliktiligin arttyrady.