Pedagogterdiń jalaqysy sońǵy bes jylda qalaı ósti
ASTANA. KAZINFORM – Qazaqstanda 8 myńǵa jýyq orta bilim berý uıymynda 400 myńǵa jýyq pedagog jumys isteıdi. Oqý-aǵartý mınıstrliginiń málimetinshe, olardyń 300 myńǵa jýyǵy attestatsııa qorytyndysy boıynsha biliktilik sanattary úshin ústemeaqy alady.
2020 jyldan bastap Prezıdent tapsyrmasyna sáıkes, pedagogterdiń aılyq eńbekaqysy 100%-ǵa ósti. Sondaı-aq 2023 jyldyń qyrkýıeginen bastap mektepke deıingi bilim berý uıymdarynyń tárbıeshileriniń jalaqysy 30%-ǵa artty. Al tehnıkalyq jáne kásiptik bilim berý uıymdaryna kásiporyndardan tartylǵan mamandarǵa 30-35% kóleminde ústemeaqy qosyldy.
«Pedagog mártebesi týraly» zań qabyldanǵannan keıin, muǵalimderdiń jalaqysynyń mólsheri biliminiń, sanatynyń (sheber, zertteýshi, sarapshy, moderator) deńgeıine jáne eńbek ótiline, júkteme kólemine, sondaı-aq eńbek etý jaǵdaıyna baılanysty qosymsha tólemder, akademııalyq dárejesiniń bolýy (10 AEK), tálimgerlik etýi, sabaqtan tys sporttyq dárister berýine (bazalyq laýazymdy eńbekaqydan 100%) baılanysty qalyptasady.
Osylaısha, túrli sanattarynyń bolýyna baılanysty pedagogterge kelesideı ústemeaqy tólenedi:
* Pedagog-sheber — 50%
* Pedagog-zertteýshi — 40%
* Pedagog-sarapshy — 35%
* Pedagog-moderator — 30%
Aýyl muǵalimderine erekshe kóńil bólinýde — olardyń jalaqysy qalalyq áriptesterine qaraǵanda, keminde 25%-ǵa joǵary.
— 2024 jyldyń qorytyndysy boıynsha Qazaqstanda muǵalimniń ortasha aılyq jalaqysy 1 mólsherleme úshin (16 saǵat) 352 myń teńge, al aýyl muǵalimderi úshin 435 myń teńgeni qurady. Bul rette Ulttyq bilim berý derekter bazasynyń málimetinshe, elimizdiń pedagogteriniń jartysy 1,5 mólsherlememen (24 saǵat) jumys jasap, aıyna ortasha 581 myń teńge jalaqy alady, — delingen mınıstrlik habarlamasynda.
Sonymen qatar, Qazaqstan bilim berý isindegi jetistikteri, olımpıada júldegerlerin daıyndaǵany jáne memlekettik nagradaǵa ıe bolǵany úshin aqshalaı syıaqymen marapattaýdy úrdiske aınaldyrǵan sanaýly elderdiń biri. 2023 jyly 89 pedagog memlekettik syıaqynyń laýreaty atandy, syıaqy kólemi 3,6 mln teńge (1000 AEK). Marapattalýshylardyń arasynda — Eńbek erleri, Qazaqstannyń eńbek sińirgen ustazdary, «Úzdik pedagog» baıqaýynyń jeńimpazdary bar.
Osylaısha, sońǵy bes jylda Qazaqstan aılyq jalaqynyń ósýin ǵana emes, ústemeaqy tóleý jáne yntalandyrý júıesin qamtamasyz etý arqyly pedagogterdiń mártebesi men qarjylyq áleýetin kóterý baǵytynda mańyzdy bastamalardy júzege asyrdy.
Aıta keteıik, 2024 jyly tamyz aıynyń aıaǵynda elimizdiń mektepterinde 398 854 pedagog jumys istep jatqany habarlandy.