Pedagogterdiń biliktiligin arttyrý, jasandy ıntellekt: Qazaqstan men Ózbekstan áriptestikti damytyp jatyr
ASTANA. KAZINFORM – Qazaqstan Oqý-aǵartý mınıstri Juldyz Súleımenova Ózbekstan Respýblıkasyna jumys sapary aıasynda eldiń Mektepke deıingi jáne mektep bilim berý mınıstri Ezoza Karımovamen kezdesý ótkizdi. Taraptar Qazaqstan men Ózbekstan arasyndaǵy bilim berý salasyndaǵy yntymaqtastyqtyń qazirgi jaı-kúıi men damý perspektıvalaryn talqylady.
Memleket basshylary júrgizip otyrǵan saıasattyń nátıjesinde eki el arasyndaǵy ózara is-qımyldyń, onyń ishinde mektepke deıingi jáne mektep bilim berý baǵytyndaǵy yntymaqtastyqtyń júıeli túrde damyp kele jatqany atalyp ótti.
Kezdesý barysynda pedagogterdiń biliktiligin arttyrý, bilim berý úderisine jasandy ıntellekt tehnologııalaryn engizý tájirıbesimen almasý, sondaı-aq eki eldiń bilim berý uıymdary arasyndaǵy kásibı baılanystardy keńeıtý máseleleri qaraldy. Sonymen qatar Qazaqstan men Ózbekstan oqýshylarynyń halyqaralyq olımpıadalarǵa, bilim berý forýmdaryna jáne ǵylymı-praktıkalyq konferentsııalarǵa belsendi qatysýy atalyp ótti.
Oqý-aǵartý mınıstrligi málimetinshe, kezdesý qorytyndysy boıynsha taraptar bilim berý salasyndaǵy áriptestikti odan ári damytýǵa jáne birlesken bastamalardy iske asyrýǵa daıyn ekenin bildirdi.
Aıta keteıik, pedagog, dáriger jáne áleýmettik sala mamandarynyń jalaqysy ósti.
