Pedagogterdiń biliktiligin arttyrý uıymdaryna oqytý nátıjeleri úshin jaýapkershilik engiziledi
ASTANA. KAZINFORM — Pedagogterdiń biliktiligin arttyrý uıymdaryna oqytý nátıjeleri úshin jaýapkershilik engiziledi. Bul týraly Májilis depýtattarynyń saýalyna Premer-mınıstrdiń orynbasary — Mádenıet jáne aqparat mınıstri Aıda Balaevanyń jaýabynda aıtylǵan.
— Pedagogterdiń biliktiligin arttyrý kýrstarynyń bilim berý baǵdarlamalaryna saraptamalyq qorytyndy berý Memlekettik kórsetiletin qyzmetter tizilimine engizildi. Sonymen qatar Oqý-aǵartý mınıstrligi bilim berý baǵdarlamalarynyń sapasyn arttyrý, saraptama rásiminiń obektıvtiligi men ǵylymı negizdiligin qamtamasyz etý maqsatynda kýrstardyń bilim berý baǵdarlamalaryna saraptama júrgizý fýnktsııasyn mınıstrliktiń Respýblıkalyq bilim berý mazmunyn saraptaý ǵylymı-praktıkalyq ortalyǵynyń quzyretine berý máselesin pysyqtaýda. Osyǵan oraı qazirgi ýaqytta mınıstrlik qaǵıdalarǵa ózgerister men tolyqtyrýlar engizý jumystaryn júrgizýde. Onyń ishinde memlekettik kórsetiletin qyzmet aıasynda bilim berý baǵdarlamalaryna aqyly negizde saraptama júrgizý máseleleri kózdelgen, — dedi vıtse-premer.
Onyń aıtýynsha, atalǵan memlekettik kórsetiletin qyzmet «Elektrondyq úkimet» portalymen ıntegratsııalanyp, mınıstrliktiń resmı ınternet-resýrsy arqyly usynylady.
— Sondaı-aq pedagogterdiń meńgergen quzyretterin praktıkada qoldanýyn baqylaýdy jáne biliktilikti arttyrý uıymdarynyń oqytý nátıjeleri úshin jaýapkershiligin bekitý maqsatynda tyńdaýshylardy kýrstan keıingi súıemeldeý tetigi kúsheıtiledi. Mınıstrlikpen kýrstan keıingi súıemeldeýdi LMS-platformaǵa engizý josparlanǵan. Bul rette quzyretterdi qoldaný dálelderin ornalastyrý, pedagogterdiń kásibı qajettilikterin dıagnostıkalaý quraldaryn keńeıtý, jasandy ıntellekt tehnologııalaryn paıdalana otyryp sabaq josparlaý boıynsha keri baılanys berý, pedagogterdiń kásibı qyzmetiniń nátıjelerin monıtorıngteý quraldaryn (sabaqtarǵa baqylaý júrgizý jáne bilim alýshylardyń bilim nátıjelerine áserin baǵalaý) paıdalaný kózdeledi. Bul biliktilikti arttyrý uıymdarymen iske asyrylatyn baǵdarlamalardyń tıimdiligi úshin jaýapkershiligin arttyrady, — dedi ol.
Aıda Balaevanyń atap ótýinshe, qazirgi kezde Mınıstrlik Joǵary aýdıtorlyq palatanyń pándik quzyretter boıynsha pedagogterdiń biliktiligin arttyrý baǵdarlamalaryn iske asyratyn uıymdarǵa memlekettik baqylaýdy júzege asyrý jóninde sharalar qabyldaý týraly nusqamasyn oryndaý aıasynda jumystar júrgizip jatyr.
Buǵan deıin elimizde orta bilim sapasyn táýelsiz baǵalaıtyn ulttyq zertteý ortalyǵyn qurý máselesi pysyqtalatynyn jazǵan edik.