Pedagogterdiń biliktiligin arttyrý kýrstaryn ótkizý qaǵıdalary jańartyldy

Jańa talaptarǵa sáıkes, biliktilikti arttyrý kýrstaryn bilim berý qyzmetin júzege asyratyn uıymdar ótkizedi. Mundaı uıymdarda kýrstyń bilim berý baǵdarlamasy baǵyty boıynsha keminde úsh jyl eńbek ótili bar trener-oqytýshylar jumys isteýi tıis.

Sonymen qatar trener-oqytýshylardyń keminde 40 paıyzy ǵylym kandıdaty, ǵylym doktory, fılosofııa doktory (PhD), beıini boıynsha doktor nemese magıstr dárejesine ıe bolýy qajet. Bul talapqa «pedagog-zertteýshi» nemese «pedagog-sheber» biliktilik sanaty bar pedagogter men tıisti saladaǵy kásiporyndar jáne uıymdarda eńbek etetin mamandar da sáıkes keledi.

Qashyqtan nemese aralas formatta oqytý júrgizetin uıymdardyń oqý protsesin basqarý júıesi (LMS) týraly málimetter ornalastyrylǵan ınternet-resýrsy bolýy kerek. Sonymen birge olardyń sanıtarııalyq talaptar men órt qaýipsizdigi normalaryna saı keletin materıaldyq-tehnıkalyq bazasy bolýy tıis.

Kýrstar barysynda uıymnyń sheshimimen óńirlik kásipkerler palatalary men jumys berýshiler qaýymdastyqtarynyń ókilderi jekelegen dárister oqýǵa jáne praktıkalyq sabaqtar ótkizýge tartylýy múmkin.

Qaǵıdaǵa sáıkes, kýrstar úsh formatta ótkiziledi:

• jumystan qol úzdirip, jalaqysy saqtalatyn kúndizgi formatta;
• jumystan qol úzbeı qashyqtan;
• kúndizgi jáne qashyqtan oqytýdy ushtastyratyn aralas formatta.

Qashyqtan jáne aralas formattaǵy oqý LMS júıesi arqyly júzege asyrylady. Bul júıede tyńdaýshynyń jeke kabıneti, oqý jáne baǵalaý materıaldary, sabaq kestesi, sondaı-aq kýrstan keıingi súıemeldeý materıaldary ornalastyrylady.

Qujatta LMS oqý protsesin basqarýdy avtomattandyrýǵa arnalǵan aqparattyq júıe retinde aıqyndalǵan.

Kýrstardyń uzaqtyǵy keminde 36 akademııalyq saǵatty quraıdy. Bir akademııalyq saǵattyń uzaqtyǵy — 45 mınýt.

Oqý aıaqtalǵannan keıin uıym bilim berý baǵdarlamasyna sáıkes qorytyndy baǵalaý ótkizedi. Baǵalaýdan sátti ótken tyńdaýshylarǵa qaǵaz nemese elektrondyq formatta sertıfıkat beriledi.

Elektrondyq sertıfıkat mindetti túrde QR-kodpen rásimdelip, pedagogterdiń biryńǵaı derekter bazasy arqyly verıfıkatsııadan ótkizilýi tıis. Mundaı jaǵdaıda qaǵaz sertıfıkat berý talap etilmeıdi.

Biliktilikti arttyrý kýrstaryn ótkizetin uıymdar pedagogterdiń biliktiligin arttyrý uıymdarynyń tizilimine engizilýi qajet.

Bilim berý uıymdary jyl saıyn kelesi kúntizbelik jylǵa arnalǵan pedagogterdiń biliktiligin arttyrý josparyn ázirlep, ótinim daıyndaıdy. Ótinimder 1 maýsymǵa deıin aýdandar men oblystyq mańyzy bar qalalardyń bilim bólimderine, al respýblıkalyq bilim berý uıymdary úshin ýákiletti organǵa joldanady.

Bilim bólimderi usynylǵan ótinimderdi qarap, pedagogterdiń biliktiligin arttyrý josparyn qalyptastyrady jáne ony jyl saıyn 1 shildege deıin bilim basqarmalaryna usynady.

Óz kezeginde bilim basqarmalary aldaǵy qarjy jylyna arnalǵan óńirlik jospardy ázirlep, pedagogterdi kýrstarǵa bólý jónindegi usynystarmen birge ony 1 qyrkúıekke deıin ýákiletti organǵa joldaıdy.

Pedagogter kásibı quzyretterin jetildirý maqsatynda biliktilikti arttyrý kýrstarynan memlekettik bıýdjet esebinen de, ózge qarjylandyrý kózderi arqyly da óte alady.

Buıryq 15 maýsymnan bastap qoldanysqa engiziledi. Onyń jekelegen normalary 12 shildeden bastap kúshine enedi.

Eske salaıyq, buǵan deıin Úkimet pedagogıkalyq kadrlardy daıarlaý sapasyn arttyrý maqsatynda pedagogıkalyq bilim berýdiń jańa modelin ázirleýdi tapsyrǵan bolatyn.