Pedagogterdiń dástúrli tamyz keńesi bıyl jańa formatta ótedi

ASTANA. QazAqparat – 24-25 tamyz aralyǵynda barlyq óńirde bilim qyzmetkerleriniń dástúrli tamyz keńesi ótedi, dep habarlaıdy QazAqparat Oqý-aǵartý mınıstrligine silteme jasap.

«Osy jyly respýblıkalyq tamyz keńesi alǵash ret jańa formatta ótedi. Barlyq 20 óńir taqyryptyq baǵyttarǵa bólindi. Keńeste pedagog-tájirıbeshiler, sarapshylar, bilim jáne psıhologııa salasynyń mamandary óz tájirıbelerimen bólisedi», - dedi Orta bilim berý komıtetiniń tóraǵasy Qanybek Jumashev.

24 tamyzda óńirlerde kelesi taqyryptyq baǵyttar boıynsha sektsııalyq otyrystar ótedi:

• Mektepke deıingi tárbıe men oqytý – Qyzylorda oblysy;

• Aýyl mektebin damytý – Aktóbe oblysy;

• Oqýǵa qushtar ult –Abaı oblysy;

• Inklıýzıvtik jáne arnaıy bilim – Qostanaı oblysy;

• Pedagog mamandardy damytý – Soltústik Qazaqstan oblysy;

• Daryndy balalar – ult zııalylary –Ulytaý oblysy;

• Innovatsııalyq bilim tehnologııalary – Almaty oblysy;

• Balalardyń demalýy men saýyǵýy – Akmola oblysy;

• Jaıly ınfraqurylymdy qalyptastyrý – Astana qalasy;

• Balalar úshin teń múmkindikter – Qaraǵandy oblysy;

• Mektepte durys tamaqtaný – ult saýlyǵynyń kepili – Almaty qalasy;

• Qosymsha bilim berý – Shyǵys Qazaqstan oblysy;

• Ulttyq qundylyqtar negizindegi tárbıe – Túrkistan oblysy;

• Balalar úshin – qaýipsiz orta – Atyraý oblysy;

• Tehnıkalyq jáne kásiptik bilim berý – Pavlodar oblysy;

• Bilim mazmunyn jaqsartý arqyly sapany arttyrý – Mańǵystaý oblysy;

• Bilim salasyndaǵy baqylaý jáne baǵalaý – Jambyl oblysy;

• Bilim salasyndaǵy qarjy-quqyqtyq tártip – Jetisý oblysy;

• Bilim salasyndaǵy basqarý negizderi – Batys Qazaqstan oblysy;

• Bilim salasyndaǵy tsıfrlyq sheshimder – Shymkent qalasy.

25 tamyzda onlaın rejımde qosylatyn 20 óńirdiń qatysýymen Biryńǵaı respýblıkalyq plenarlyq otyrys ótedi.

Oǵan bilim berý júıesiniń 12 myń qyzmetkeri qatysady. Forýmnyń plenarlyq otyrystary mınıstrliktiń, oblystyq bilim basqarmalarynyń, vedomstvolyq baǵynysty uıymdardyń Facebook, Instagram jáne YouTube jelilerindegi paraqshalarynda kórsetiledi.