Pedagogterdi attestattaý rásimi jetildiriledi

ASTANA. QazAqparat – Pedagogterdi attestattaý rásimin jetildirý is-sharalary qabyldanady. Bul jaıynda Májilis depýtattarynyń saýalyna Úkimet basshysy Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Memleket basshysynyń tapsyrmasyn oryndaý úshin pedagogterdi attestattaýdan ótkizý rásimin jetildirý jóninde is-sharalar qabyldanatyn bolady. Osy maqsatta pedagogıkalyq qoǵam ókilderi men sarapshylar qatarynan jumys toby quryldy», - dep atap ótedi Premer-Mınıstr jaýabynda.

Onyń aıtýynsha, jumys nátıjeleri boıynsha normatıvtik-quqyqtyq aktilerge tıisti ózgerister engiziletin bolady.

«Bul rette, attestattaý protsesiniń shynaıylyǵyn, ashyqtyǵyn qamtamasyz etý úshin pedagogterdiń portfolıosyn qaraý ártúrli aqparattyq júıelerden derekter avtomatty túrde qalyptastyrylatyn biryńǵaı elektrondyq platformada júzege asyrylatyn bolady. Attestattaýdyń árbir kelesi kezeńine jiberý de avtomatty túrde júzege asyrylatyn», - dedi Álıhan Smaıylov.