Pedagogterden aqsha jınaǵan: ShQO-daǵy arnaıy mektep-ınternatta tekserý júrgizildi

ÓSKEMEN. QazAqparat – Shyǵys Qazaqstan oblysyndaǵy múmkindigi shekteýli balalarǵa arnalǵan mektep-ınternat pedagogteriniń aryzy boıynsha tekserý júrgizildi, dep habarlaıdy QazAqparat tilshisi.

Áleýmettik jelilerde Óskemende ornalasqan №8 arnaıy mektep-ınternat tárbıelenýshilerine az mólsherde jáne dámsiz tamaq beriletindigi týraly aqparat tarady . Sondaı-aq, onda ınternat basshylyǵynyń pedagogterden aqsha jınaǵany, ǵımarat ishiniń sýyqtyǵy, turmystyq hımııa zattarynyń tapshylyǵy aıtylǵan.

Atalǵan faktige oraı, ShQO bilim basqarmasy tekserý júrgizdi. Basqarma mamandary men bilim jáne ǵylym qyzmetkerleri kásipodaǵynyń Óskemen qalalyq uıymy ókilderi tarapynan jumys toby qurylǵan.

«Internat qyzmetkerleri bizge aryz túsirgen. Tekserý qorytyndysy boıynsha ınternattaǵy balalardyń quqyqtary buzylmaǵany anyqtaldy. Biraq, shaǵymdardyń bir bóligi rastaldy. Atap aıtqanda, boıaý alý úshin eńbek ujymynan aqsha jınalǵan. Osyǵan baılanysty dırektordyń mindetin atqarýshy jaýapkershilikke tartylady», - deıdi oblystyq bilim basqarmasynyń qorǵanshylyq, qamqorshylyq jáne arnaıy bilim berý bólimi basshysynyń mindetin atqarýshy Gúljaz Boshaqova.