Pedagogterdi tegin oqytý baǵdarlamasy sáýirde bastalady
ASTANA. KAZINFORM – Qazaqstanda alǵash ret jetim jáne ata-anasynyń qamqorlyǵysyz qalǵan balalarmen jumys isteıtin pedagogterge arnalǵan júıeli oqytý baǵdarlamasy engiziledi. Bul týraly Oqý-aǵartý mınıstrliginiń baspasóz qyzmeti habarlady.
Osy bastama aıasynda «Órken» ulttyq ǵylymı-praktıkalyq ınstıtýtynyń halyqaralyq sertıfıkat alǵan 51 mamany trener retinde óńirlerdegi áriptesteriniń biliktiligin arttyrýǵa kirisedi. Pılottyq joba sáýir aıynda Astana men Almaty qalalarynda bastalyp, jyl sońyna deıin respýblıkanyń barlyq óńirin qamtıdy. Oqý kýrstary muǵalimder úshin tegin júrgiziledi.
Atalǵan joba Oqý-aǵartý mınıstrligi men «SOS Qazaqstan balalar aýyldary» qorynyń yntymaqtastyǵy nátıjesinde júzege asyp otyr. Oqytý baǵdarlamasy halyqaralyq sarapshylardyń qatysýymen ázirlenip, zamanaýı ádistemelerge negizdelgen. Bul óz kezeginde mamandardyń kásibı daǵdylaryn jan-jaqty jetildirýge múmkindik beredi.
Arnaıy ázirlengen 80 saǵattyq oqý baǵdarlamasy barlyq qajetti saraptamalyq qorytyndydan ótti.
Aıta keteıik, búgingi tańda elimizdegi jetim balalarǵa arnalǵan 73 mekemede 2 myńǵa jýyq pedagog eńbek etedi. Jańa kýrstar osy mamandardyń áleýetin arttyrý arqyly balalar úılerindegi tárbıe men bilim sapasyn jaqsartýdy, sondaı-aq balalardyń ál-aýqatyn qamtamasyz etýdiń ozyq halyqaralyq standarttaryn engizýdi kózdeıdi.
Aıta ketelik pedagog-assıstentter jumysqa konkýrssyz qabyldanatyny týraly jazǵan edik.