Pedagogterdi qorǵaý: oqýshynyń mektepten tys ýaqytyna ata-ana jaýapty bolady
ASTANA. KAZINFORM — Pedagogter balalardyń ómiri men densaýlyǵy úshin tek oqý-tárbıe protsesi kezinde jaýapty bolady. Bul týraly Májilistiń jalpy otyrysynda bilim berý máseleleri boıynsha ózgeris engizýdi talqylaý kezinde depýtat Ashat Aımaǵambetov málim etti.
— Zań úsh bloktan turady. Birinshisi — jaýapkershilik máselesi. Prezıdent Tamyz keńesinde ustazdar oqýshylardyń qaýipsizdigi úshin tek oqý-tárbıe protsesi jáne laýazymdyq mindetterin oryndaý aıasynda ǵana jaýapty bolýy kerek ekenin atap ótip, osyny zańnamalyq turǵyda retteýdi tapsyrdy. Bul shyn máninde úlken másele. Byltyr elimizde rezonans týdyrǵan birneshe jaǵdaı boldy. Jazda keshki ýaqytta nemese demalys kúnderi oqýshylar quqyq buzý áreketine barǵan, sondaı-aq keleńsiz oqıǵalarǵa tap bolǵan. Sol kezde olardyń janynda muǵalimder bolmady. Pedagogter demalysta, úılerinde boldy, sebebi kanıkýl kezi edi, ıaǵnı jumys ýaqytynan tys merzim. Biraq soǵan qaramastan, mektep dırektorlary men muǵalimder jazalandy, tipti jumystan shyǵarýǵa deıin barǵan. Árıne, bul — ádiletsizdik, — dedi Ashat Aımaǵambetov.
Osy oraıda ol zańǵa naqty norma engiziletinin, pedagogter balalardyń ómiri men densaýlyǵy úshin tek oqý-tárbıe protsesi kezinde jáne óziniń laýazymdyq mindetteri aıasynda ǵana jaýapty bolatynyn atap ótti.
— Jazǵy demalys, túngi ýaqyt, demalys kúnderi — ata-ananyń jaýapkershiligi. Endi eshqandaı ekiudaı túsinik bolmaýy tıis, ıaǵnı pedagogterdi osylaı qorǵaımyz, — dedi depýtat.
Buǵan deıin pedagogterdi áleýmettik jaǵynan qoldaýdyń qandaı tetikteri bar ekenin jazǵan edik.
