Pedagogterdi daıarlaıtyn 52 joǵary oqý orny jumys istese de, kadr tapshylyǵy bar — Úkimet
ASTANA. KAZINFORM — Qazaqstan Respýblıkasynyń Premer-mınıstriniń orynbasary — mádenıet jáne aqparat mınıstri Aıda Balaevanyń tóraǵalyǵymen bilim berý júıesi úshin kadrlar daıarlaý máselesine arnalǵan keńes ótti. Bul týraly Úkimettiń baspasóz qyzmeti málim etti.
Keńes jumysyna ǵylym jáne joǵary bilim mınıstri Saıasat Nurbek, oqý-aǵartý mınıstri Juldyz Súleımenova, eńbek jáne halyqty áleýmettik qorǵaý mınıstriniń mindetin atqarýshy Asqarbek Ertaev, sondaı-aq bolashaq pedagogtardy daıarlaýǵa mamandanǵan joǵary oqý oryndarynyń basshylary qatysty.
— Kezdesýdiń negizgi taqyryby pedagogıkalyq bilim berý sapasy jáne oǵan tikeleı baılanysty mektepke deıingi jáne mekteptegi oqytýdaǵy ózekti máseleler boldy. Vıtse-premerge Pedagogıkalyq bilim berýdi damytý tujyrymdamasyn iske asyrýdyń negizgi baǵyttary men nátıjeleri baıandaldy. Sonymen birge EYDU júrgizetin Halyqaralyq oqytý men oqý zertteýiniń (TALIS) aıasynda daıyndalǵan analıtıkalyq qorytyndylar tanystyryldy. Zertteý keıingi úsh jyldaǵy pedagogtardy daıarlaý júıesin jańǵyrtý barysyndaǵy oń ózgeristerdi de, onyń álsiz tustaryn da kórsetti. Atap aıtqanda, joǵary oqý oryndaryndaǵy muǵalimder men tárbıeshilerdi sapasyz daıarlaý faktileri men mektep túlekteriniń jetkiliksiz daıyndyq deńgeıi ózara baılanysty máseleler retinde atap ótildi, — delingen habarlamada.
Sonymen birge keńes barysynda fýnktsıonaldyq saýattylyqty arttyrý, muǵalimderdiń synı oılaý men tsıfrlyq daǵdylaryn damytý ádistemelerinen bastap, jasandy ıntellektti oqý úderisine engizýdiń naqty tetikterine deıingi birqatar máseleler talqylandy.
Buǵan qosa, búgingi tańda Qazaqstanda bakalavrıat deńgeıinde pedagog daıarlaý lıtsenzııasy bar 52 joǵary oqý orny jumys istep jatqanyna qaramastan, kadr tapshylyǵynyń saqtalyp otyrǵany erekshe atap ótildi.
Qordalanǵan máselelerdi eńserý jóninde salalyq vedomstvolar basshylarynyń kózqarastarymen qatar, pedagogıkalyq joǵary oqý oryndarynyń basshylarynyń pikirleri de tyńdaldy.
Óz kezeginde vıtse-premer Aıda Balaeva qalyptasqan jaǵdaıdyń sebepterine nazar aýdardy. Atap aıtqanda, mınıstrlik — ákimdik — joǵary oqý orny arasyndaǵy tıimdi vedomstvoaralyq ózara is-qımyldyń joqtyǵyn atady. Onyń aıtýynsha, tek ózara úılesimdi jáne júıeli jumys qana mektepterdi qajetti mamandarmen qamtamasyz etýge jáne óńirlerdegi kadr tapshylyǵyn aldyn ala, tıimdi túrde sheshýge múmkindik beredi. Al bul tapshylyqtyń negizgi faktory — eńbek naryǵyna jasalatyn jan-jaqty taldaýdyń bolmaýy.
— Kadr tapshylyǵyna baılanysty óńirler boıynsha qabyldaý saıasatyn qaıta qaraý qajet. Keı jerlerde fakýltetterge qabyldaý kólemin arttyrý kerek. Eger bizge pán muǵalimderi, mysaly, matematıkter jetispese — tıisti granttar bólý qajet. Joǵary oqý oryndary eńbek naryǵyna beıimdelýi tıis. Jaqyn ýaqytta salada aıtarlyqtaı ózgerister oryn alýy múmkin. Aıtalyq, jasandy ıntellekttiń damýyna baılanysty birqatar mamandyq ózektiligin joǵaltady. Osyny eskere otyryp, joǵary oqý oryndary men kolledjder naryqtyń naqty qajettilikterine saı jumys isteýi tıis, — dedi Aıda Balaeva.
Sondaı-aq ol pedagogtardy daıarlaý sapasyna tikeleı áser etetin praktıkaǵa baǵdarlanǵan oqytýdyń da mańyzyn atap ótti.
— Tájirıbesiz teorııanyń paıdasy joq. Mamannyń bilimi tek ony is júzinde qoldanǵanda ǵana nátıjeli bolady. Barlyq joǵary oqý oryndarynyń stýdentterdiń praktıkalyq daıyndyǵyn uıymdastyrýda teń múmkindigi bolýy tıis. Alaıda bul naqty ári muqııat josparlaýdy talap etedi. Búginde biz bolashaq muǵalimderdi daıyndaǵanymyzben, jas mamandar dıplom alǵan soń salada qalmaıdy. Bul óz kezeginde kadr tapshylyǵyn arttyra beredi. Bul máseleni sheshý úshin kúsh biriktirýimiz kerek. Qazir vedomstvolar arasyndaǵy ózara is-qımyl burynǵydan da mańyzdy. Ortaq maqsat pen mindetterimiz bar ekenin umytpaýymyz qajet, — dedi vıtse-premer.
Sóz sońynda QR Premer-mınıstriniń orynbasary birqatar naqty mindetter men hattamalyq tapsyrmalardy atap ótip, olardyń múmkindiginshe qysqa merzimde oryndalýynyń mańyzdylyǵyn basa aıtty.
Birinshiden, salalyq mınıstrlikter joǵary oqý oryndarymen birlese otyryp, Pedagogıkalyq bilimdi damytý tujyrymdamasyn tolyqtyryp, jasandy ıntellekt tehnologııalarynyń qoǵamdyq ómirge belsendi enip jatqanyn eskerýi qajet.
Ekinshiden, pedagogtardy daıarlaý protsesin praktıkalyq baǵytta kúsheıtip, stýdentterdiń óndiristik tájirıbesin respýblıka kóleminde bir júıege keltirip engizý boıynsha jumys josparyn ázirleý kerek.
Úshinshiden, memlekettik bilim granttaryn qaıta bólý máselesin qarastyryp, ony mindetti túrde óńirlik qajettilikter men túlekterdiń eńbekke ornalasý nátıjelerine sáıkestendirý qajet.
Tórtinshiden, mektepke arnalǵan oqýlyqtardy daıarlaý júıesin qaıta taldap, oǵan jetekshi pedagogıkalyq ýnıversıtetterdiń mindetti túrde qatysýy qamtamasyz etilýi tıis.
Sonymen qatar vıtse-premer joǵary oqý oryndaryn memlekettik ıdeologııalyq jumysty ilgeriletýde belsendi bolýǵa shaqyryp, onyń bolashaq pedagogtardy, ásirese balabaqsha júıesindegi mamandardy daıarlaýdaǵy erekshe mańyzdylyǵyn atap ótti. Osy oraıda, Ǵylym jáne joǵary bilim mınıstrligine elimizdiń barlyq JOO-larynda Memleket basshysy bekitken ishki saıasatty júzege asyrýdyń jańa qaǵıdalaryn tárbıelik júıege engizý jumystaryn uıymdastyrý tapsyryldy.
Al orta bilim berý júıesinde kadr tapshylyǵy tolyq joıylǵany habarlanǵan edi.