Pedagogterdi attestattaýdan ótkizý erejeleri ózgerdi

— Osy Pedagogterdi attestattaýdan ótkizý qaǵıdalary men sharttary Eńbek kodeksiniń 139-babynyń 7-tarmaǵyna, «Bilim týraly» zańnyń 44-babynyń 5-tarmaǵyna, «Pedagog mártebesi týraly»zańnyń 14-babyna, «Memlekettik jáne áleýmettik jaýapkershiligi bar kórsetiletin qyzmetter týraly» zańnyń 10-babynyń 1) tarmaqshasyna sáıkes ázirlendi jáne pedagogterdi attestattaýdan ótkizý tártibin aıqyndaıdy, — delingen qujatta. 

Sonymen qatar, «biliktilik sanaty» uǵymy jańa redaktsııada jazylǵan.

— Biliktilik sanaty — Oqý-aǵartý mınıstriniń 2025 jylǵy 24 aqpandaǵy № 31 buıryǵymen bekitilgen Bilim berý uıymdarynyń pedagogterine arnalǵan kásiptik standarttardy jáne Bilim jáne ǵylym mınıstriniń 2009 jylǵy 13 shildedegi № 338 buıryǵymen bekitilgen Pedagog laýazymdarynyń úlgilik biliktilik sıpattamalaryna (Normatıvtik quqyqtyq aktilerdi memlekettik tirkeý tiziliminde № 5750 bolyp tirkelgen) sáıkes pedagogtiń kásibı quzyrettilik deńgeıi, — delingen buıryqta. 

Odan bólek, memlekettik qyzmet «pedagog-moderator», «pedagog-sarapshy» biliktilik sanattaryna platforma arqyly kórsetiledi.

Al «pedagog-zertteýshi», «pedagog-sheber», «úshinshi sanattaǵy basshy», «ekinshi sanattaǵy basshy», «birinshi sanattaǵy basshy», «úshinshi sanattaǵy basshynyń orynbasary», «ekinshi sanattaǵy basshynyń orynbasary», «birinshi sanattaǵy basshynyń orynbasary» biliktilik sanattaryna memlekettik qyzmet «tsıfrlyq úkimettiń» veb-portaly arqyly kórsetiledi.

Tómendegi qujattardy usyný qajet:

· ótinish;

· bilimi týraly dıplom (tsıfrlyq júıelerde málimetter bolmaǵan jaǵdaıda);

· qaıta daıarlaý kýrstarynan ótkenin rastaıtyn qujat (bolǵan jaǵdaıda);

· qyzmetkerdiń eńbek ótilin rastaıtyn qujat (tsıfrlyq júıelerde málimetter bolmaǵan jaǵdaıda);

· bilim berý salasyndaǵy ýákiletti organmen kelisilgen bilim berý baǵdarlamalary boıynsha biliktilikti arttyrý kýrstarynan ótkendigi týraly sertıfıkat;

· biliktilik sanatynyń berilgenin rastaıtyn kýálik pen buıryq (biliktilik sanaty bar tulǵalar úshin);

· kásibı jetistikteri men tájirıbesi jónindegi qujattar;

· bilim alýshylardyń jetistikterin rastaıtyn qujattar;

· esse (250–300 sóz).

Al jeke basyn kýálandyratyn qujat, bilimi jáne eńbek ótili týraly málimetter elektrondyq úkimet arqyly tıisti memlekettik organdardyń tsıfrlyq júıelerinen alynady.

«Pedagog-moderator» jáne «pedagog-sarapshy» biliktilik sanattaryna attestattalýshylardyń qujattary Platformada qalyptastyrylady.

Qyzmet kórsetýshi memlekettik qyzmetter monıtorınginiń tsıfrlyq júıesine qyzmet kórsetý kezeńderi týraly derekterdiń engizilýin qamtamasyz etedi.

Osy Qaǵıdalarǵa ózgerister nemese tolyqtyrýlar engizilgen jaǵdaıda, bilim berý salasyndaǵy ýákiletti organ normatıvtik quqyqtyq akt memlekettik tirkelgennen keıin úsh jumys kúni ishinde engizilgen ózgerister men tolyqtyrýlar týraly aqparatty «tsıfrlyq úkimettiń» operatoryna, qyzmet kórsetýshilerge jáne Biryńǵaı baılanys ortalyǵyna jiberedi.

Pedagogterdiń bilimin baǵalaýdan ótken attestattalýshylardyń tsıfrlyq derekter bazasy bes jyl boıy saqtalady.

Attestattaý oqý jylynda bir ret ótkiziledi. Attestattaýǵa ótinishter bilim berý salasyndaǵy ýákiletti organ belgilegen merzimderde qabyldanady.

Qyzmet nátıjelerin keshendi túrde taldap, qorytyndylaý aǵymdaǵy oqý jylynyń qańtar-tamyz aılary aralyǵynda júrgiziledi.

Buıryq 2026 jylǵy 21 shildeden bastap qoldanysqa engiziledi.

Aıta keteıik, buǵan deıin pedagogterdiń bilimin baǵalaýǵa ótinishter qabyldaý bastalǵanyn jazǵanbyz.