Pedagogterdi attestattaý júıesine ózgeris engiziledi
ASTANA. KAZINFORM – Oqý-aǵartý mınıstrligi pedagogterdi attestattaý júıesine birqatar ózgeris engizip jatyr. Júrgizilip jatqan reformalardyń negizgi maqsaty - pedagog eńbegin ádil ári ashyq baǵalaý júıesin qalyptastyrý, artyq talaptar men negizsiz qarjylyq shyǵyndardy qysqartý.
Jańa attestatsııa pedagogterdiń jumys nátıjesine negizdeledi ári barynsha túsinikti, obektıvti formatqa kóshiriledi.
Negizgi ózgeris – pedagogterdiń bilimin baǵalaý testi tolyǵymen toqtatylady. Testileýden pedagogıkalyq mamandyq boıynsha oqý oryndaryn aıaqtap kelgen jas mamandar, pedagogıkalyq ótilin toqtatyp, qaıta jumysqa ornalasýǵa nıet bildirgen pedagogter ótedi. Sonymen qatar PBB testi bilim berý uıymdarynyń basshylary, basshy orynbasarlary, ádistemelik ortalyq (kabınet) ádiskerleri úshin de saqtalady.
Mektepte keminde 2 jyl úzdiksiz eńbek ótili bar pedagogter biliktilik sanatyn alýǵa ótinim bere alady. Olardyń biliktiligin baǵalaý jańa qaǵıdalarǵa sáıkes tek praktıkalyq nátıjeler negizinde júrgiziledi. ıAǵnı, pedagogtiń portfolıosyndaǵy kásibı jetistikteri men oqýshylarynyń nátıjesi, oqý-tárbıe jumysyn júrgizýdegi deńgeıi baǵalanady.
Sondaı-aq barlyq deńgeı úshin avtorlyq baǵdarlamalar men oqý-ádistemelikterin usyný talaby alynyp tastalady.
– Atalǵan ózgerister 2027 jyldan bastap engiziletin attestattaý júıesine baılanysty ekenin esterińizge salamyz. Jańa júıege birtindep kóshý maqsatynda ótpeli kezeń engiziledi. PBB-ny birinshi ret tapsyrý kezinde málimdelgen biliktilik sanatyna qajetti shekti ball jınaı almaǵan pedagogterdiń qoldanystaǵy biliktilik sanattary men tıisti ústemaqylary tolyq kólemde saqtalady. Olardyń attestattaýy 2026-2027 oqý jylyna aýystyrylyp, jańa Qaǵıdalar boıynsha, PBB tapsyrý qajettiliginsiz ótkiziledi. PBB tapsyrý endi attestattaýdan ótýdiń mindetti sharty bolyp tabylmaıdy, - delingen mınıstrlik habarlamasynda.
Osylaısha, jańa qaǵıdalarda atalǵan normanyń alyp tastalýyna baılanysty PBB-ny qaıta (aqyly negizde) tapsyrýdyń kúshi joıyldy. PBB-ny qaıta tapsyrý úshin tólengen qarajat tolyq kólemde qaıtarylady.
Testileýden ótken, belgili sharttarǵa sáıkes PBB tapsyrmaı sanattaryn rastaıtyn pedagogter qoldanystaǵy qaǵıdalarǵa sáıkes attestattaýdan osy oqý jylynda ótedi.
Qazirgi ýaqytta pedagogterdi attestattaýdyń jańa formatynyń qaǵıdalary ázirlenip jatyr. Oqý-aǵartý mınıstrligi bul modeldi engizý máseleleri boıynsha buqaralyq aqparat quraldary ókilderine arnalǵan brıfıng ótkizetin bolady.
Buǵan deıin pedagogterdiń jumysyn jeńildetetin qandaı ózgerister engiziletinin jazǵan edik.