Pedagogterdi attestattaý júıesinde ne ózgeredi

ASTANA. KAZINFORM — Qazaqstanda pedagogterdi attestattaý júıesi qaıta qaralyp, muǵalimderge túsetin artyq júkteme qysqartylady. Bul týraly Oqý-aǵartý vıtse-mınıstri Shynar Aqparova Ortalyq kommýnıkatsııalar qyzmetinde ótken brıfıngte málimdedi. 

— Qoldanystaǵy attestattaý tetikteri pedagogterge negizsiz artyq júkteme túsirip otyr. Ásirese testileýge daıyndyqtyń kóp ýaqyt alýy, portfolıo qalyptastyrýdyń kúrdeliligi jáne avtorlyq materıaldardyń praktıkalyq mańyzyna qatysty suraqtar muǵalimniń negizgi mindetine — bilim sapasyna kóńil bólýine kedergi keltiredi, — dedi vıtse-mınıstr.

Osyǵan baılanysty attestattaý júıesi ońtaılandyrylyp, artyq talaptar qysqartylady.

— Endi pedagogtiń kásibı deńgeıi test nátıjesimen emes, onyń kúndelikti jumysy men bilim berý sapasyna qosqan naqty úlesi arqyly baǵalanady, — dep naqtylady ol.

Vıtse-mınıstrdiń málimetinshe, ózgeristerdiń biri — pedagogter úshin mindetti pándik testileýdiń alynyp tastalýy.

— Bul talap tek pedagogıkalyq qyzmetke jańadan kelgen mamandarǵa, jumysyn qaıta bastaǵan muǵalimderge, sondaı-aq bilim berý uıymdarynyń basshylary men ádiskerlerine qatysty saqtalady, — dedi ol.

Sonymen qatar pedagog kadrlardy daıarlaý júıesinde de ózgerister bar.

— Joǵary oqý oryndaryna qabyldaýda test nátıjelerimen qatar arnaıy emtıhandardy qamtıtyn aralas baǵalaý modeline kóshý kózdelip otyr. Budan bólek, pedagogıkalyq mamandyqtarǵa qoıylatyn talaptar kúsheıtilip, shekti ball 75-ke deıin kóterildi, — dep tolyqtyrdy vıtse-mınıstr.

Budan ózge, attestattaý talaptary da jeńildetildi.

— Endi esse jazý, ǵylymı maqala jarııalaý jáne avtorlyq baǵdarlamalar ázirleý mindetti emes. Bul muǵalim eńbegin qaǵazbastylyqtan aryltyp, naqty nátıjege baǵyttaýǵa múmkindik beredi, — dedi ol.

Taǵy bir mańyzdy ózgeris — attestattaý protsesin tolyq tsıfrlandyrý.

— Barlyq rásim «Ustaz» platformasy arqyly júrgiziledi. Bul qujat aınalymyn qysqartyp, protsestiń ashyqtyǵy men qoljetimdiligin arttyrady, — dep atap ótti Shynar Aqparova.

Onyń aıtýynsha, jańa júıe pedagogtiń kásibı erkindigin arttyryp, onyń shyǵarmashylyq jáne ádistemelik áleýetin tolyq iske asyrýǵa jaǵdaı jasaıdy.

Sonymen qatar qoldanystaǵy tártipke sáıkes, belgilengen talaptardy oryndaǵan pedagogterge tıisti biliktilik sanaty boıynsha qosymsha aqy jańa oqý jylynyń basynan bastap tólenedi.

— Al alǵashqy testileýde shekti deńgeıge jete almaǵan pedagogterge qaıta tapsyrý múmkindigi beriledi, — dep túsindirdi vıtse-mınıstr.

Jańartylǵan attestattaý modeli pılottyq rejımde engiziledi. Qazirgi ýaqytta tıisti qujat jobasy kelisý satysynda. Aldaǵy ýaqytta pedagogterge keń kólemde túsindirý jumystary júrgiziledi.

Buǵan deıin Oqý-aǵartý mınıstrligi pedagogterdi attestattaý júıesine ózgerister engiziletinin habarlaǵan edi.