Pedagogter men ǵylymı qyzmetkerlerdiń jaǵdaıyn jaqsartý, júk tasymaly: Prezıdent birneshe zańǵa qol qoıdy
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy, dep habarlady Aqordanyń baspasóz qyzmeti.
Zańǵa engizilgen túzetýlerdiń birinshi blogy pedagogter men ǵylymı qyzmetkerlerdiń materıaldyq jaǵdaıyn jaqsartýǵa baǵyttalǵan.
Atap aıtqanda, belgili bir ǵylymı dárejesi men ataǵy bar pedagogter úshin aı saıyn tólenetin qosymsha aqy mólsheri ulǵaıtyldy. Máselen, fılosofııa doktory (PhD), beıini boıynsha doktor, ǵylym kandıdaty ǵylymı dárejesi jáne qaýymdastyrylǵan professor (dotsent) ataǵy úshin tólenetin qosymsha aqy 25 AEK-ti (92 300 teńge) quraıdy. Al ǵylym doktory jáne qaýymdastyrylǵan professor (dotsent) ǵylymı ataǵy úshin 42 AEK (155 064 teńge), fılosofııa doktory (PhD), beıini boıynsha doktor, ǵylym kandıdaty, ǵylym doktory dárejesi jáne professor ǵylymı ataǵy úshin 50 AEK (184 600 teńge) mólsherinde qosymsha aqy tólenedi.
Ǵylymı dárejeleri men ataqtary úshin osyndaı aı saıynǵy qosymsha aqy negizgi jumys ornynda ǵylymı-zertteý jumystaryn júrgizetin ǵylymı qyzmetkerlerge de belgilendi. 40 jasqa tolmaǵan daryndy jas ǵalymdarǵa joǵary jáne (nemese) joǵary oqý ornynan keıingi bilim berý uıymynyń endaýment-qorynyń ınvestıtsııalyq kiris qarajatynan stıpendııa alý quqyǵy berildi.
Zańǵa engizilgen túzetýlerdiń ekinshi blogy áskerı qyzmetshilerge bilim berý jeńildikterin engizýdi kózdeıdi. Naqtyraq aıtqanda, merzimdi áskerı qyzmetin ótegennen keıin áskerı qyzmetshilerdiń joǵary jáne (nemese) joǵary oqý ornynan keıingi bilim berý uıymdarynda oqýy úshin bilim berý granttaryna kvotalar engizildi.
Túzetýlerdiń úshinshi blogy kásipkerlik sýbektilerdiń qarajaty esebinen qarjylandyrylatyn ǵylymı jáne (nemese) ǵylymı-tehnıkalyq qyzmet nátıjelerin kommertsııalandyrý jobalaryna qatysty zańnamany jetildirýge baǵyttalǵan. Túzetýlerdiń tórtinshi blogyna sáıkes jergilikti atqarýshy organdarǵa ǵylym jáne ǵylymı-tehnıkalyq qyzmet salasyndaǵy memlekettik saıasatty iske asyrýǵa qatysý jáne ǵylym men ǵylymı-tehnıkalyq qyzmetti damytý úshin tıisti jaǵdaı jasaý boıynsha birqatar ókilettik beriledi.
Sonymen birge Memleket basshysy «Táýelsiz Memleketter Dostastyǵyna qatysýshy memleketterdiń qoǵamdyq densaýlyq saqtaý salasyndaǵy sanıtarııalyq-epıdemıologııalyq sıpattaǵy tótenshe jaǵdaılardyń aldyn alý jáne olarǵa den qoıý jónindegi yntymaqtastyǵy týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.
Sonymen qatar Memleket basshysy «Qazaqstan Respýblıkasynyń Úkimeti men Túrkııa Respýblıkasynyń Úkimeti arasyndaǵy halyqaralyq quramdastyrylǵan júk tasymaldary týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.
Zań mátinderi baspasózde jarııalanady.